Leitlangpui Music Festival 2026 Organising Committee ṭhukhawm

Vawiin khan Leitlangpui Music Festival (LMF) 2026 Organising Committee chu an Chairman, Pu Lalnghinglova Hmar, Tourism Minister ni bawk hovin a pisa, MINECO-ah an ṭhukhawm.

Leitlangpui Music Festival Organising Committee ṭhutkhawmah hian Tourism Department-i’n mawh la bik tura a ruat event management agency (EMA) ‘BBY Animals’ aiawhten ruahmanna an siam dan report an pek ngaihthlak hmasak niin, inbuatsaihna kalpui dan tur uluk taka sawiho a ni a. Sawrkar Department hrang hrangte mawhphurhna leh hmalak dan turte sawiho a ni bawk.

Ruahman lawk dan chuan November ni 11 – 13, 2026 hian ni thum awh tur Leitlangpui Music Festival hi neih tur a ni a, a nghahna hmun tur hi Lunglei High Powered Committee (HPC) Vice Chairman Pu V. Malsawmtluanga, MLA hova thlan nise tiin an rel a ni.

Leitlangpui Music Festival, 2026 Organising Committee Chairman Pu Lalnghinglova Hmar chuan a vawi thumna atana LMF buatsaih tura ruahmanna kalpui ṭan a ni chu lawmawm a tih thu a sawi a, LMF hmasa pahnihah pawh hmasawnna tam tak hmuh tur a awm a, a vawi hnihna nikumah phei chuan Mizoram pawn aṭangin rock band an rawn tel hial a, phai lam media-te beng pawh thlengin Mizoram hming a ri ring hle a ni a ti a. Hetiang festival lian tham buatsaih hi a hautak bakah Mizoram pum huap a nih avangin Tourism Department mai ni lova, Department hrang hrangte organising committee ah telin phur taka an thawkho ṭhin chuan he festival hlutna hi a pholang chiang hle a ni a ti.

Leitlangpui Music Festival, 2026 Organising Committee-ah hian sawrkar Department hrang hrang – Home, PWD, P&ED, PHED, Health & Family Welfare, Commerce & Industries, Art & Culture leh IPRP&S te an tel a, Lunglei District bawrhsap chu a hmuna engkim lo buaipuia ruahmanna kalpuitu tur a ni ang.