MLA Pu Jeje Lalpekhlua’n Hnahthial District atanga Chief Minister’s Rubber Mission Phase-II dawngtute hnenah tanpuina hlan
South Tuipui Bialtu MLA, Pu Jeje Lalpekhlua chuan vawiin khan DC Conference Hall, Hnahthialah Chief Minister’s Rubber Mission Phase- II tanpuina chu Hnahthial District atanga dawngtu mi sawmriat (80) te hnenah a hlan a. Hnahthial District Bawrhsap, Pi K. Vanlalruati chuan hlanna programme hi kaihruaiin Er. Andy Liansanglawma, District Soil Conservation Officer chuan Hnahthial District chhunga CM Rubber Mission Phase -II kalpui tawh dan report a pe a ni.
MLA chuan kalkhawmte zahna chibai bukin CM Rubber Mission thil tum ber chu kuthnathawktute tan eizawnna ngelnghet siamsak a, rubber tharchhuah kawnga Mizoram hming chher a nih thu sawiin Hnahthial District tan rubber tharchhuah leh process kawnga sulsutu an ni tih in hre reng tura a duh thu a sawi a. He hmalakna hi keimahni tan mai ni lo vin kan tu leh fa kal zel turte tan pawh a ni tih hre reng tura a duh thu a sawi bawk. Pawisa leh hmathatna kan dawnin kan duhtawk mai thin chu pawi a tih thu sawiin sawrkarin mipui leh ram hmasawnna tura ruahmanna a siamte chu a thlen dik theihna tur chuan thil reng reng a nihna ang taka hman a tul thu a sawi a ni.
MLA chuan Mizoramin sawhthing kan hmingthanpui mek thu sawiin chutiang bawkin Rubber lamah pawh hming kan chher ve thei a ni a ti a. A ti tak takte chu pui an hreh loh thu sawiin theihtawp an chhuah chuan a phak ang tawka theihtawp a chhuahpui ve tur thu a sawi bawk.
CM Rubber Mission hi 2024 khan tlangzarh niin Hnahthial District-ah Phase – II hi 2025 atang khan bul tan a ni a. Hnahthial District tan hian hectare sawmriat (80) pek niin progress partner sawmriat (80) an awm mek a, he Mission kalpui tur hian Rubber Producer Society (RPS) panga (5) din niin Cluster (zau) pakhat theuh an enkawl a ni.
