Larsap-in New India Mission hnuaia Internship Programme hmang ho mek IIT Madras leh NIT Mizoram zirlaite a kawm
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan New India Mission hnuaia Internship Programme hmang ho mek, Indian Institute of Technology (IIT) Madras zirlai 11 leh National Institute of Technology (NIT) Mizoram zirlai 21 te chu Durbar Hall, Lok Bhavan-ah a kawm.Larsap General (Dr) Vijay Kumar Singh chuan New India Mission Internship Programme chu hmalakna tha tak a nih thu sawiin, hemi kaltlang hian engineering zirlai ngaihtuahna hrang hrang neite thiamna leh theihna thawh khawm hmanga mipuite harsatna sutkian sak tum a ni, a ti a. IIT Madras chuan India ram tan hna ropui tak tak a lo thawh tawh thu sawiin, thingtlang mite harsatna zirchianga a chinfel theih dan tur NIT Mizoram nena thawk hova an ngaihtuah tur chu lawmawm a tih thu a sawi a. Zirlaite chu New India Mission thiltumte hriaa theihtawp chhuah tura chahin, ruahmanna tha tak siam theitu an nih thu a sawi a ni.
Larsap chuan Mizoram chu agriculture sector-a innghat tlat a nih thu sawiin, hlawk zawka thlai thar chhuah, supply chain mumal zawk siam leh thlai thar sawngbawlna lamah hmasawnna a awm theih nana ngaihtuahna seng turin a chah a. Thingtlanga chengte harsatna chu ngun taka zirchianga puih theih dan tur ruahmanna tha zawk duan chhuah tum turin a fuih a. Mizoram an cham chhunga hun nuam tak hmang turin duhsakna a hlan a ni.
He hunah hian zirlaite hi Dr. Sukanta Roy, Dean (Academics), Faculty In-Charge, T&P and Students Exchange, NIT Mizoram chuan hovin New India Internship Programme kalphung leh hun hman dan turte a sawifiah a. Larsap hnenah hian zirlaite chuan Mizorama an vahvelna atanga an thil hmuh leh tawnhriatte an thlen a. Zawhna an neihte zawtin inkawmhona hun hlawk thlak tak an hmang a ni.IIT Madras zirlai 11 leh NIT Mizoram zirlai 21, an vaiin zirlai 32 te hian New India Mission hnuaiah ‘Technology and Rural Development’ tih thupui hmangin December ni 16, 2025 atanga January ni 10, 2026 chhung hian Mizoramah New India Internship (Pilot) hun an hmang ho dawn a. Hemi hun chhung hian thiamna hrang hrang nei zirlaite hian Mizorama khaw hrang hrangte tlawhin zirchianna an nei dawn a. A bik takin energy, tui, hriselna leh agriculture kaihhnawiha harsatna awmte project siamin chinfel dan tur an zawng dawn a ni.
