Kolasib-ah nasha mukt saptah hmanna kal zelah walkathon neih a ni
India ram pum huapa ruihhlo do kawnga beihpui thlakna lian, Nasha Mukt Bharat Abhiyaan (NMBA) hnuaia ‘Nasha Mukt Saptah’ (June 17 – June 26) hmanna kal zelah Kolasib District chuan a hun pui ber (main event) atan vawiin zingkar khan Walkathon buatsaih a ni a.
Ruahmanna angin Walkathon tanna tur hmun hniha lo ruahman saah thawktu hotute team hnihah an inthen nghal a. Kolasib Bawrhsap Pu H. Dolianbuaia hova team khatte chu Khuangpuilam lamah kalin, Additional DC Pi B. Malsawmtluangi hova team dangte chuan Regional Sports Training Centre, Saidan lam an pan ve thung a ni. Heng hmun an thlen hian Walkathon-a tel tura lo inpeih sa kalkhawmte chu ruihhlo do thutiam (NMBA Pledge) lak tir an ni a, hemi hnu hian ruihhlo do chungchanga au hla te thahnemngai taka sawi rual in hun hman a ni.
Vawiina he ruihhlo do hmalaknaah hian zirlai naupang leh thalaite an tel tha hle a. Jawahar Navodaya Vidyalaya (JNV), Sussane Downs Boarding School, St. John’s Higher Secondary School, DIET leh Sports & Youth Services (SYS) department hnuaia Football Academy atangte in participants thahnem tak an tel a ni. He huna tel zawng zawngte hnenah hian NMBA T-shirt chu a thlawna sem vek a ni.
