ICT Minister Dr. Vanlalthlana’n nikhat awh State-level Workshop a hman pui
Vawiin chawhma khan Mc Cable Hall, Aijal Club, Aizawl ah Information & Communication Technology (ICT) Department buatsaihin nikhat awh ‘State-Level Workshop on Strengthening Cyber Security Frameworks for State Data’ neih a ni a. He hunah hian ICT Minister Dr. Vanlalthlana chuan Khuallian niin workshop hi an hmanpui a ni. Workshop ah hian Mizoram Sawrkar hnuaia department hrang hrang aiawh official thahnem tak an tel.
ICT Minister Dr. Vanlalthlana chuan ICT department in workshop pawimawh tak ‘State-Level Workshop on Strengthening Cyber Security Frameworks for State Data’ a buatsaih thei chu lawmawm a ti a, mipuite himna tura an privacy vawinhim sak, an hamthatna tur ngaihtuah leh rinngam nih hi sawrkar tihtur pawimawh tak zinga pakhat a ni, a ti. Tunah hian sawrkar chuan mipuite digital data tamtak kawlin, a kutah a awm mek a; mimal identity kaihhnawih te, land record emaw welfare benefits te pawh sawrkar hian a vawn mek thu a sawi a. Digitization hi sawrkar hmanraw tangkai tak a nih rualin fimkhur ngaihna tam tak a awm thu sawiin, mipui ten digital governance-ah rinna an nghah theih nan an data-te him taka enkawl sak a ngaih thu a sawi a. Data enkawl kawngah digital entry point te khauh taka vawn him a, sensitive data zawng zawng mi dangin an hmuh theih lohna tura khuahkhirh (encrypt) vek a nih theihna tura tunlai thiamna kan hman a ngaih thu sawiin, automated monitoring system-te pawh hman tangkai a, minute reilote chhung pawha security system-a thil pawi awmte hmachhawn vat thin a tul thu a sawi bawk.
ICT Minister hian workshop hi hun lo la kal zel tur atan Mizoram digital security atana hmalakna pawimawh tak a nih thu sawiin, senior officer leh technical team te chu cybersecurity hi phurrit anga ngai lova, rorelna tha, langtlang taka kalpui theihna lungphum anga en turin a ngen a ni.
