DM&R Minister Prof. Pu Lalnilawma’n Ngaizel petrol pump bul leiminna hmun a tlawh
Vawiin khan Disaster Management and Rehabilitation Minister Prof. Lalnilawma chuan Ngaizel petrol pump bula leiminna hmun a enfiah.Minister chuan leimin avanga buaina tawk an awm chu pawi a tih thu a sawi a. Report dawn danin, zan hmasa thleng khan khaw cheng avanga chiatna thleng hi Zoram hmun hrang hrang, hmun sawmhnih pakua velah a awm thu a sawi. Sawrkar chuan chhiatrupna thleng avanga harsatna hrang hrang awm thei te sukiang turin a inpeih reng thu sawiin, mipuite chu chi ai lo tur leh fimkhur turin a chah a, Sawrkar hotute lakah rinna nghat ngam turin a chah bawk a ni.
Minister chuan district tinah chhiatrupna thleng thei lakah inven dan leh hmalak dan tur ngaihtuah mek zel a nih thu a sawi a, State Disaster Management Authority leh District Disaster Management Authority-te pawh theihtawp an chhuah zel thu sawiin, hmun hrang hranga BDO-te leh Zonal Officer-te pawh a rang thei ang bera che chhuak thei tura hrilhhriat an nih thu a sawi bawk. Chhiatrupna avanga sawrkar atanga tanpuina dawn theih awm ang te pawh felfai tak leh dan (rules and law) behchhana pek chhuah an inhuam reng thu a sawi a ni.
Prof. Lalnilawma chuan mipuite chu chhiatrupna thleng thei hrang hrang lakah inring renga awm turin a duh thu a sawi a; chhiatrupna a lo thlenin mipuite chu chi ai mai lova sawrkar hrilhhre vat tura chahin, State Emergency Operation Center leh District Emergency Operation Center-te chu eng hunah pawh biak pawh reng theih an nih thu a sawi a, a tul a nih chuan mimal phone call pawhin inhrilhhriat mai chu a tha a tih thu leh a inhuam reng thu, Minister chuan a sawi bawk a ni.Leiminna hmunah hian Minister hi Diaster Management lama sawrkar hotuten an tawiawm bawk a ni.
