Gauhati High Court in Sairang leh Vairangte inkar kawngpui siamthat hna thawktu zawhna a zawt
Gauhati High Court chuan Sairang leh Vairengte inkar kawngpui siamthat hna thawktu pakhat chu hna an la zawh loh za zela 65 chu engtin nge April thla chhunga an zawh theih dan tur a zawt.
Justice Michael Zothankhuma leh Justice Nelson Sailo te thutna bench chuan Mizoram Truck Drivers Association (MTDA) in an pawl General Secretary Pu Lalhmudika Tochhawng kaltlang a Aizawl leh Silchar inkar kawngpui chhe lutuk chungchanga Public Interest Litigation (PIL) an thehluh a ngaihtuahna kal zelah Nilaini khan he thil hi ngaihtuah leh a ni a. Judge-te chuan he lai kawngpui tluan enkawltu National Highways and Infrastructure Development Corporation Ltd. (NHIDCL) chu an hnuai a contractor J. Infratech Limited-in hna an thawh dan report chu affidavit hmangin chawlhkar 2 chhungin court-ah thehlut turin an ti a. Contractor hian kawng siamthatna atan hian lung chang tha (limestone rock) a hmang em tih finfiah turin a ti a, contractor pawh lung chang tha an hmang ngei em tih affidavit thehlut turin a hriattir bawk.
Contractor J. Infratech Limited hian Sairang Zero Point leh Buichali lei inkar, New Khamrang leh Kawnpui inkar leh Kolasib leh Bilkhawthlir inkar siamthat hna an thawk mek a ni. J. Infratech Limited ukil Pu Anil Kumar chuan a hma lamah khan kumin April thla chhung ngei a hna thawh zawh fel an tum thu affidavit hmanga a thehluh thu sawiin tun dinhmunah hian hna hi za zela 35 chauh an la zawh thu a tarlang a. Court chuan J. Infratech Limited chu affidavit hmang ngei-in an hna la thawh bak za zela 65 chu engtin nge April thla chhunga thawh zawh hman an tum dan chiang taka ziak lang turin a hriattir a, chu bakah kawngpui siamthat hna an thawhna hrang hrangte dinhmun chiang taka ziak turin an ti bawk. He thubuai hi April ni 22 a ngaihtuah leh tura dah a ni.
