Social Welfare, Women & Child Development Minister-in Rashtriya Poshan Maah 2026 a khar
Vawiin khan Irrigation & Water Resources Depariment Hall, MINCECO-ah Rashtriya Poshan Maah 2026 kharna, Performance Review of all Districts & ICDS Projects leh State Award semna hun hman a ni a, Social Welfare, Women & Child Development Minister Pi Lalrinpuii chu khuallian niin hun a hmanpui.
He hunah hian Minister Pi Lalrinpuii chuan thu a sawi a, 9th Rashtriya Poshan Maah 2026 hlawhtling taka an hmang thei chu lawmawm a tih thu sawiin, an hmalakna hrang hrang thlirletna (review) an neihah te an thawh thatzia a lang chiang hle a ni, a ti. Tun Poshan Maah thupui ber, ‘Hamari Anganwadi Hamari Jimmedari’, Kan Anganwadi, Kan Mawhphurhna tih chu an hlen tha hle tih a sawi a, ‘Wadi Makpa’ Anganwadi Centre tana ‘Pa’ hlu zawng chhuak (identify)-a, an han pho chhuah te khan Anganwadi ngaihsak kawngah mi tam tak, a bik takin pate a than harh tir a beisei thu a sawi bawk.
Minister chuan ram dangin an neih ve loh ‘Tlawmngaihna’ hmanga Anganwadi Centre te khawtlangın an ngaihsak thin chu hlu a tih thu a sawi a, an hmalakna hrang hrang leh an hnathawhte chuan awmzia a nei a, ram leh khawtlangah danglamna a thlen tih chu mipuiten an hriat loh a hlauh thu a sawi.
Khuallian chuan an hnathawh hrang hrangte thlirletna hun an nei thei chu lawmawm a tih thu sawiin, an hnathawh dan an inhriatpui tawn hian inzirna tur leh hmasawn an ngaihna lai turte an hriat chhuah phah thei thin a ni, a ti. Hna tha taka thawk te chu chhuanawm a tih thu a sawi a, vawiin programme chu mahni inenletna atan leh hmasawnna atan an hman a duh thu sawiin, kalkhawmte chu a duhsakna sang ber a hlan a ni.
Minister chuan State Level Award, (Anganwadi Worker leh Helper, District, Project, CDPO, CO leh Poshan Staff) hna thawk thate chawimawina hun an hmang dawn tih a sawi a, hnathawk thate chu a ngaihhlut thu leh chawimawi phu a tih thu sawiin, lawmman la turte pawh a lawmpui thu a sawi bawk. Lawmman dawng ve lote pawhin rilru nat nana hmang lo a, a lehpeka dawng thei tura inhlankai tum turin a chah a, lawmman dawngte pawh thleng chhuak tawh anga inngai mai loin, hma sawn tum zel turin a chah nghal a ni. 9th Rashtriya Poshan Maah, (National Nutrition Month) 2026 chu lawm taka a khar thu a sawi bawk.
