ECI Deputy Director Pu Apurva Kumar Singh chuan SIR 2026 kalpui mek chungchangah Mizoram tlawhin, DMNO-te Media & Communication training a pe
Election Commission of India (ECI) bul tuma May ni 20, 2026 aṭanga September ni 6, 2026 inkar chhunga uluk zawka electoral roll siam ṭhat runpui, Special Intensive Revision (SIR) of Electoral Rolls kalpui mek chungchangah ECI Deputy Director Pu Apurva Kumar Singh chuan Mizoram rawn tlawhin, Mizoram Chief Electoral Officer (CEO) Pi Garima Gupta, IAS, nen a pisaah an inkawm a. Hemi hnu hian MINECO Aizawla Secretariat Conference Hall-ah Mizoram District hrang hranga media lama mawhphurtu, District Media Nodal Officer (DMNO)-te nen Media & Communication chungchanga hma lakna kal mek thlir hovin, hma lak zel dan tur an sawi ho.
He hun hi Mizoram Joint Chief Electoral Officer Pi Ethel Rothangpuii chuan kaihruaiin, inlawmna thu a sawi a. ECI hmalaknaa SIR kalpui tawhna state-ah hlawhtling taka kalpui a nih thu sawiin, Mizoramah pawh hlawhtling taka kalpui turin mawhphurhna hrang hrang neite’n theih tawp an chhuah thu a sawi.
ECI Deputy Director Pu Apurva Kumar Singh chuan SIR chu India khua leh tui kum 18 tling chin, electoral roll-a chuang theite kim taka electoral roll-a an chuan theihna tur leh vote nei thei lote roll-a an chuan lohna tura hma lakna pawimawh tak a nih thu a sawi a. SIR hlawhtling taka kalpui a nih theih nan media kal tlanga zau taka puanzar leh hma lakna hrang hrangte tar lan a pawimawh thu sawiin, chumi atan chuan ruahmanna fel tak duan lawk a, chumi anga hma lak chu a pawimawh thu a sawi a. SIR kaihhnawiha hma lakna hrang hrang thlalak leh video ṭha taka dah ṭha a, media leh social media hrang hrang kal tlanga zau zawka theh darh zel turin mawhphurtute a chah.
He hunah hian District hrang hranga District Media Nodal Officers leh District Media Assistant Nodal Officers-te’n an hma lak tawhna leh hmachhawpte an sawi a. ECI Deputy Director Pu Apurva Kumar Singh chuan powerpoint presentation hmangin “Media & Communication SOP” zirtirin, SIR chungchang puanzar leh tihlar kawnga hma lak dan tur leh ngaih pawimawh tur hrang hrang a zirtir a. Zawhna leh chhanna leh sawi hona hun hman a ni bawk.
Pu Apurva Kumar Singh hian naktukah ERO office tlawhin, BLO ten Enumeration Form an sem dan te a enpui ang a. Chawhnu lamah chanchinthar lakhawmtute kawmna hun a hmang dawn a ni.
