Chief minister hovin mizoram state policy coordination committee thukhawm
Vawiin khan Planning & Programme Implementation Conference Hall-ah Chief Minister hovin Mizoram State Policy Coordination Committee-te an thukhawm a, Bana Kaih kalpui tawh chinte thlirletin, kalpui zel turte an sawiho. Handholding Scheme CEO Pu Lalfakzuala chuan report a pe a. CM Special Package Phase 1 ah khan Progress Partner 2,255 neiin Rs. 18.33 Crore sen a ni a, phase 2 ah Progress Partner 3,113 thlang tawhin Rs. 4.25 Crore senna tur a ni a, sum hi la pek chhuah vek loh deuh a ni. Dilna la endik fel loh hi 2,135 a awm mek. Phase 3 kalpui mai tawh tur a nih avangin heng la endik loh (pending) te hi a ranglama umzui ni se an ti a, sum la pek kim lohte pawh a rang lama pek ni se, an ti.
Loan component bikah hian a vaiin Progress Partner 742 thlan tawh an ni a, an zingah hian loan hmu tawh hi 482 an awm a, an loan hmuh zat belhkhawm hi Rs. 44.05 Crore a tling tawh a. MRB chuan pe hnem berin Partner 314 an pe tawh a, an an loan pek zat belhkhawm hi Rs. 23.98 Crore a ni a, a pe tam ber dawttu chu SBI niin mi 104 an pe a. An pek zat belhkhawm chu Rs. 9.48 Crore niin a pathumna chu MCAB an ni a, mi 59 an pe a, an pek zat belhkhawm hi Rs. 10.20 Crore a ni.
An loan punna rulhsakna (Interest Subvention) hi Progress Partner 479 te tan tum hnih kalpui tawh a ni a. A tum khatnaah Rs. 15,92,137 pek a ni a, a tum hnihnaah Rs. 96,21,210 pek a ni. Guarantee Fee pawh Rs. 14,01,762 pek chhuah tawh a ni.
