Serchhip District Addl. DC hovin National Highway 02 Inspection Team te fehchhuak
Nimin khan Serchhip DC ruahmanna-in National Highway 02 Inspection Team te chuan Keitum leh Khumtung inkar kawng chhia thawmthat mekte an endik leh a, tun dinhmunah chuan duhthusam chiah la ni rih lo mah se a tha thawkhata an hriat thu an sawi a, chutihrual erawh chuan fur ruahtui tlak lai a nih avangin kawng hi ni hnihkhat thilthu leka la khuar chhe zung zung thei a ni a, chuvangin Daily Maintenance kalpui reng turin Contractor te an chah.
National Highway Inspection Team kaihruaitu Addl. DC Pi Dorothy Muansangi chuan NHIDCL hotu lawkte leh an hnuaia Contractor (KRAM Infracon Pvt. Ltd., Shivalaya Construction Ltd. leh Bhartia Infra Projects Ltd.) te chu Serchhip District-in kawngpui tha leh tlo kan neih theih nan District Administration level atangin an vil reng dawn tih hrilhin, MJA leh khawtlang hruaitute nen tangkawpin National Highway Inspection hi an kalpui zel dawn tih a hrilh a, inthlahdah lo turin a hriattir.
Addl. DC Pi Dorothy Muansangi chuan tun dinhmunah ruahtui tlak lai a nih avangin kawng Blacktopping tih tak tak theih a ni rih lova, kawng khuar chhe zual, lirthei tana tlan hrehawm tur hnawh rih mai a nih thu sawiin, fur ruahtui tla a reh fel veleh September thla chawhnu lam atangin Serchhip District chhunga National Highway 02 chhia zawng zawngte hi NHIDCL hnuaia Contractor-te hi Blacktopping tha taka tihtir leh vek kan tum a, chutih hunah chuan mipui lam pawhin hmanraw tha lo hman an tum em tihte lo enpuia, a tha lo leh mit tlung lote chu District thuneitute hnena hriattir zel tur te, chumi atan chuan ‘Vantlang Viltu App’ te pawh mipui ten hmang tangkai tura a duh thu a sawi.
Vawiin atang hian NH 02 Serchhip By Pass Road, Kikawn to Sailiamkawn inkar kawng chhia pawh thawmthat hna thawh tan nghal a ni dawn a, ni 7 chhungin Contractor Kram Infracon Pvt.Ltd. te hian a khuar chhe zualpui hnawh zawh hman an tum dawn a ni.
Kawng siam mek endiknaah hian Addl. DC Pi Dorothy Muansangi bakah Pu Chawngthu Lalrinhlua SDC te, DC office NH Staff te, Joint VC atangin Vice Chairman Pu PC Vanlalvena te, Sub-Hqrs. YMA lam atangin President Pu PC Vanlalluna te an tel a, MJA atangin President Pu Kapliana Pachuau hovin member eng emaw zat thawkchhuak bawkin DIPR Serchhip ten an tawiawm bawk.
NHIDCL Project Manager Sashikant Maui, Resident Engineer Ram Niranjan Parsad, leh Field Engineer Jiten Raut te, Kram Infracon Pvt.Ltd. General Manager Ayush Tiwari leh an Public Relation Officer Pu Lalhruaitluanga te, Shivalaya Construction Ltd. Contractor Satendra Prajapati ten Inspection Team te hi lo dawngsawngin kawng endiknaah an lo tawiawm a ni.
