Aizawl District Inspection Team ten damlo inenkawlna hmun Day Care Centre an enfiah
Clinical Establishment Act kengkawhtu Aizawl District Registering Authority thuchhuak angin vawiin khan Aizawl District tana ruat Inspection Team te chuan Aizawl khawpui chhunga Day Care Centre pathum an tlawh.
Inspection Team ten vawiina Day Care Centre an tlawh te hi Trinity Day Care Centre, AR Day Care Centre leh Zote Day Care Centre an ni a, nimin khan hmun li (4) an lo tlawh tawh bawk.
Heng Day Care Centre te hi a hmunah an hnathawh dan te, an hmanraw hman te, an hnathawktute hnathawh dante, an bawlhhlawh sawngbawl dan te leh an buiding thlengin Inspection Team te hian an enfiah a. Mipui tana himlo leh hriselna khawih pawi thei te a awm chuan dan anga hma lak tura tih a ni.
Clinical Establishment Act hi Central Act niin Mizoram in kan hman tura duan a ni a. He Act hian Clinical Establishments zawng zawng, damlo te damdawi leh investigation hmanga enkawlna hmun – Hospital, Clinic, Dental Clinic, Laboratory, Imaging Centre leh in enkawlna hmun hrang hrang te a huam a. Clinical Establishment Act hian heng Day Care Centre hrang hrang te inkhuahkhirhna dan siamin, an in ziahluh (register) na tur siamsak an ni.
Clinical Establishment Act hi mipuite thatna tur leh in enkawlna changtlung zawk neih theihna tura tih a nih angin, harsatna tawk emaw lungawilohna nei chuan Convener, District Registering Authority, Chief Medical Officer Office Aizawl West ah ziaka thehluh theih a ni.
Inspection team-ah hian District Magistrate aiawh te, AMC aiawh te, SP Office aiawh te leh Health Department aiawh te an tel a ni.
