Chhipphir Khuarel chhiatna thleng enfiahin Zonal Officer-in Report pe
Nimin thli leh ruah nasa tak thawk vanga Chhipphir khaw chhunga chhiatna thleng enfiah turin vawiin khan SDC, Pu Lawrence Lalhlanthara leh Chhipphir Zonal Officer, Pu Lalhruaitluanga, SDC te chu a hmunah an kal a. Theih ang angin tlawmngaia thawkchhuakte nen tangruala hma la nghalin chhiat tawkte chhawmdawl nan silpauline 116 an sem nghal bawk a ni.
Zonal Officer, Pu Lalhruaitluanga report danin nimin khuarel chhiatna vanga in chhia hi sawmsarih leh pathum (73) awmin a pumpui (100%) a chhia hi pahnih (2) an awm a, chhungkaw riah chhuah ngai sawmhnih (20) an awm bawk. Hei bakah hian Indoor Hall chu thliin a chung hikin electric ban 3 a tluk bakah line chat a awm nual a. Community Hall bakah Dawmdawiin store room chungte chu thliin a hik ve ve a report niin Chhipphir leh Zote ‘S’ inkar kawng thing te chu a tluk nual thu tarlan a ni bawk.
Report tarlan danin nimin April ni 27,2026 tlai dar 4:25 leh tlai dar 4:40 inkar khan thli nasa tak tleh vangin chhiatna tarlan takte hi a thleng a. A thlen lai hria, VB-G RAM G hnuaia hnathawktute chuan thli hi thawngaleivir ang maia a rawn tleh thu an sawi a ni.
Zonal Officer kalte chu Bualpui ‘V’ atangin tlawmngai mi sawmsarih (70) leh Zote ‘S’ atangin tlawmngai mi sawmli (40) te chuan an tawiawm a. Chhiatna thlenna hmun tinte chu tlawh kualin a theih ang angin a hmunah chawmdawlna hna hi thawh nghal a ni.
Zonal Officer-te chuan chhiatna tawkte tanpui nan silpauline za leh sawm paruk (116) semin, tlawmngaia thawkchhuak hnatlangte thingpui lumna tur pawisa fai ₹ 4000/- an pe bawk.
