Census 2027 inpuahchahna kal zelah State Level Conference on Census buatsaih a ni
Vawiin khan Chief Secretary, Pu Khilli Ram Meena kaihhruaiin Secretariat Conference Hall-II, MINECO-ah Census official-te nen Inchhiarpui (Census 2027) Phase-II kalpui dan tur inhrihhriatna leh sawi hona – “One Day State Level Conference on Census” chu neih a ni a. Phase-II ah hian Mizorama mipui awm zat inchhiarna (Population Enumeration) neih a nih tur thu leh raltlante pawh chhiar tel an nih tur thu tarlan a ni.
Chief Secretary chuan Inchhiarpui atanga data lakkhawmte chu India ramin policy hrang hrang, a bikin Vikshit Bharat 2047 tih hlawhtlin kawnga a hman tangkai turte an nih dawn avangin uluk leh felfai thei anga bera kalpui a tul thu a sawi a. Census laimu ber pakhat, mipui awmzat inchhiarna chu Phase-II ah hian neih a nih tawh dawn avangin Phase-I aiin thawhrim lehzual a ngai dawn a ni a ti a. District leh field level officer-te chu an mamawhna kawngah puih an inhuam reng thu sawiin theihtawp chhuah a, Phase-I ang bawkin Phase-II ah hian Mizoram chu State zo felfai hmasa ber nih tum leh turin a chah a ni.
Pu Vinod P Kavle, Director of Census Operations chuan kalkhawmte lawmna thu sawiin Pu Jamil R. Swer, Deputy Director, Census Operations chuan Census 2027 Phase-II kalpui dan tur leh training neih dan turte a sawi a; Pu Sudhir Kumar, Principal Secretary, GAD chuan kalkhawmte hnenah hriattur tul bakah fuihna thuchah a sawi a ni.
2027 Inchhiarpuiah hian India ramah vawi khatna atana online hmanga mahni inziahluh theihna (Self-Enumeration via Digital Mode) chu kalpui niin Phase-I: House Listing and Housing Census(HLO) ang bawkin Phase-II: Population Enumeration-ah hian Self Enumeration hi kalpui a ni ve dawn a. Ruahman danin Self Enumeration hi January ni 10, 2027 atanga January ni 24, 2027 (15 days) chhunga neih tur niin House to House Enumeration hi January ni 25, 2027 atanga February ni 28, 2027 chhunga neih tur a ni a, March ni 1, 2027 atanga March ni 5, 2027 chhungin ennawnna (Revision Round) neih tur a ni bawk ang.
A vawikhatna atan Caste Census neih tur niin Mizorama Scheduled Caste 16 (sawm leh paruk) awmte chu an zat chhinchhiah an ni anga, Raltlan (Refugees) te pawh chhiar tel vek tur niin India khua leh tui nihna an nei tihna erawh a ni lo thung. Census-ah hian Adhaar card number share duh lo an awm chuan tihluih tur an nih loh tur thu tarlan niin Special Intensive Revision (SIR) 2026-a engemaw vanga tel lo te pawh census-ah chuan chhiar tel vek an nih tur thu tarlan a ni.
