ASF vanga vawk thi an pung zel
Kumin chhungin African Swine Fever (ASF) vawk pulhri natna leng avangin Mizoramah vawk 151 a thi leh tawh.
Animal Husbandry & Veterinary department hotute sawi danin kumin January thla bul atanga Ningani thleng khan ASF vawk pulhri leng avangin vawk 151 thi tawhin vawk pulhri darh zel tur venna atan vawk 39 suat a ni tawh bawk. Vawk pulhri leng avang hian Serchhip district-ah leh Aizawl district-ah vawk thi report leh vawk suat a awm a. Serchhip district-ah chuan khawpui chhung – Chanmari veng, P&E veng leh Kawnpui North vengah a leng a, Aizawlah chuan Durtlang Leitan Ramthar leh Durtlang Suaka Vengah te a leng a ni. Serchhipah hian vawk 144 a thi tawh a, Durtlangah hian vawk 7 a thi tawh a. Vawk suat 39-te hi Serchhip district ami vek a ni a, Durtlang veng 2-ah chuan suat a la awm lo a ni. Nilaini khan Serchhipah hian P&E veng leh Kawnpui North-ah vawk 12 ve ve, a vaiin 24 a thi a. Ningani khan Serchhip district Kawnpui North-ah vawk 12 thi-in P&E vengah vawk 6 a thi leh bawk a. ASF vawk pulhri leng hi Serchhip khawpui leh Aizawl khawpui veng panga a chhungkaw 40-in an tuar tawh a, Serchhip khawpui veng 3 a chhungkaw 38 leh Durtlang veng pahnih a chhungkaw 2 te an ni.
Vety department hotute chuan kumina ASF vawk pulhri leng hi state pawn atanga vawk lakluh vang a ni tih finfiahna a awm lo tih an sawi a. Kum 2021 March ni 21 a Lungsen khua a ASF hri avanga vawk thi hmuhchhuah a nih atang khan tun thlengin kumtin he vawk pulhri hi Mizoramah a la leng chho ta ziah a. ASF vawk pulhri hian Mizoram hi a chen chilh chho ve tawh hrim hrim a an ngaih thu leh kum tin, kum tir lam ruah tlak hnu a khaw ro chho leh lum chho zelah a darh nasa duh thin ni a an hriat thu an sawi a ni.
