Agriculture & farmers’ welfare minister pu pc vanlalruata chuan govt hrangbana college freshers’ social and felicitation programme a hmanpui
Vawiin chawhma khan Agriculture & Farmers’ Welfare Minister Pu PC Vanlalruata chuan, Govt. Hrangbana College Freshers’ Social and Felicitation programme-ah Khuallian niin a hmanpui. Minister Pu PC Vanlalruata chuan thu sawiin, Khuallian tura sawmna a dawn khan rang taka pawm a nih thu leh, kum 32 liamta khan Govt. Hrangbana College zirlai a nih ve thin thu a sawi a. Programme-ah an hunlaia zirtirtu hlui lo tel ve chu lunglenthlak tiin, ani pawh zirlai a nih ve thinlai chuan Student Union leader te a ni ve thin a, college extension pawh SU leader a nih laia an nawrchhuah a nih thu a sawi. Hrangbana College chu an hunlai atang tawhin college tha, zirlai nei tam an ni thin a; NEHU enkawlna hnuaiah awm thinin, sports lamah pawh an duai lo hle thin hle a ni, a ti. Minister chuan admission chungchangah pawh Govt. HrangbanaCollege kalphung chuan dikna an ngaih pawimawhzia a sawi a; Minister sawipuitu neiin awmzia a neih loh thu leh, zirlai lut mek te chu anmahni thiamna vang liau liaua lut thei an ni ,a ti.
Cooperation Minister a nih angin zirlai te chu Cooperative Movement-ah tuina thar nei turin a fuih bawk a. Mahnia kan tihtheih loh hi a huho chuan a lo awlsam zawk thin a, chuvangin, zirlai te pawh an eizawnna tur zawn theuhah thiante nen tangho a, cooperative society te din a hma la turin a fuih. Cooperative Sector hian hma a sawn chuan, ramin hma a sawn thin a ni, a ti. Lehkha zir mai piah lamah, zirlai te chu NSS, SSU tih te leh co-curricular activities hrang hrangah inhmang tam a, dai zau turin a sawm bawk. Pu PC Vanlalruata chuan zirlai te chu nakin lawka ram leh khawtlang hruaitu turte an nih avangin, ramin hma a sawn zel theihnan theihtawp chhuah turin a fuih a; Govt Hrangbana College chu Minister a nih theihnana amah chhertu a nih thu a sawi. Zirlai luttharte leh lo lut tawh zawng zawng te duhsakna hlanin, Freshers’ Social programme hlimawm tak an neih theihnan duhsakna a hlan bawk a ni.
Minister hian Govt. Hrangbana College Annual Magazine leh, “James Dokhuma Thu leh Hla Zir Zauna” tih lehkhabu a tlangzarh nghal bawk. Heng bakah hian Minister chuan R. Zatlaia Award te, Maiti Award te, Zokaitluangi Psychology Award te leh lawmman dang te a sem bawk a ni. Govt. Hrangbana College Principal Pu Lalthlengliana Hrahsel chuan college aiawhin programme-a tel zawng zawng te lawmna thu a sawi a. Freshers aiawh hian Lalruatkima, Education Department 1st Semester zirlai chuan thu a sawi bawk.
