Mizoram Power Minister Pu F Rodingliana chu North Eastern Regional Power Committee (NERPC) Chairman-ah ruat thar
Ministry of Power chuan nimin khan Power Minister Pu F Rodingliana chu North Eastern Regional Power Committee (NERPC) Chairman atana ruatna Order a tichhuak a, Mizoram Power Minister zinga he dinhmun chelh thei hmasa ber a ni. North Eastern Regional Power Committee (NERPC) hi Danpui Electricity Act 2003 behchhana Ministry of Power hnuaia din niin, hmarchhak (North East States)7 te chu member an ni.
New Delhi a cham mek P&E Minister Pu F Rodingliana hi nimin khan India Prime Minister Narendra Modi in a hawn, Ministry of New & Renewable Energy (MNRE) leh International Solar Alliance (ISA) tangkawpin a buatsaih ‘Bharat Renewable Energy Summit & Expo 2026’ ah a tel a. He Expo leh Summit hi Bharat Mandapam, New Delhi-ah neih a ni. Hawnna programme (launching programme) hman zawh hian Union MNRE Minister kaihhruaina hnuaiah State Chief Minister te leh Energy Minister te puala Round Table Plenary Session buatsaihah Pu F Rodingliana hi tel nghalin Mizoram power sector tihchangtlunna tur mamawh hrang hrangte a thlen bawk.
State Chief Minister-te leh Power Minister te intawhkhawmnaah hian Pu F Rodingliana chuan renewable energy sector ah kawlphetha tam tak thar chhuak turin Mizoramin theihna (potential) a ngah thu sawiin, hei hi haichhuak turin Renewable Energy Ministry puihna mamawh a nih dan te a tarlang a. MNRE Ministry-in kumin 2026 kum tira Scheme thar ‘Small Hydro Power Development Scheme’ a tihchhuah thar hmanga puih dan dap turin a ngen a. P&E MInister hian PM Suryaghar: Rooftop Solar scheme kalpui kawngah Mizoram chu a titha pawl a nih thu tarlangin, central subsidy bakah State subsidy pe tel State tlemte zinga mi a nih thu Union Minister chu hrilhin, solar hmanga kawlphetha tharchhuah te tipung tura Mizoram Sorkarin hma a lakna te kalkhawmte hnenah a hrilh a ni.
Minister Pu F Rodingliana hian November ni 3, 2026 chawhma khan Delhi Mizoram House-ah New Development Bank (BRICS Bank) aiawhte hmu in, Tuivai Hydro Power Project siamnana funding chungchang a sawipui a. NDB aiawhte hian funding an pek theih tur thu sawiin, Department of Economic Affairs (DEA) erawh kaltlang a ngaih tur thu Minister an hrilh a; DEA nen indawr hnuah la inbiak leh turin thu an dah a ni.
