Mizoram Larsap-in ruihhlo do beihpui thlakna tura ruahmanna State Action Plan to Combat Drug Menace a tlangzarh, Home Minister-in Tlangmawi chu Mizorama ruihhlo laka fihlim hmasa ber khuaah a puang

Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin chawhnu khan kum 2026-2029 chhunga ruihhlo do beihpui thlakna tura ruahmanna ‘State Action Plan to Combat Drug Menace 2026-2029’ chu Assembly Annexe Conference Hall, Aizawlah Khuallian niin a tlangzarh. Khualzahawm Home Minister Pu K. Sapdanga’n Tlangmawi, Khawzawl district chu Mizorama ruihhlo laka fihlim hmasa ber khuaah a puang a, khawtlang hruaitute certificate a hlan a ni.

Hemi puala hun hmanah Larsap General (Dr) Vijay Kumar Singh chuan Sawrkarin tanrualna hmanga ruihhlo do a ngaih pawimawh takzet thu sawiin, Prime Minister-in kar 100 awh tur ruihhlo do beihpui ‘Nasha Mukh Bharat Sankalp Abhiyan’ August ni 2, 2026 ah a tlangzarh thu leh India ram chu December 31, 2029 ah chuan ruihhlo hmanga sumdawnna awm lohnaa siam tum a nih thu a sawi a. Ruihhlo do dan tur ruahmanna tlangzarh tak chu khawtlang tanrualna leh inzirtirna behchhana thalaite ruihhlo laka chhanchhuahna tur a ni tih sawiin, “Tun hi a bultanna a ni a, kum 3 hnuah a rah chhuah kan hre thei dawn a, a hlawhtlin theih nan kan zavaiin lungrual taka kan thawh ho a tul a ni, a ti bawk.

Larsap chuan Mizorama ruihhlo laka khaw fihlim hmasa bera puan tak Tlangmawi khaw mipuite thinlung taka a lawmpui thu leh chhuanawm a tih thu sawiin, hei hian khawtlang inlungrualna leh inpekna a entir a, Mizorama pum ruihhlo laka filhim siam turin mitinin mawhphurhna kan nei a ni, a ti. Ruihhlo do kawnga enforcement agency hrang hrangte thahnem ngaihna fakawm tiin, hmalak dan tur tlangzarh tak chu YMA kum puan “Ruihhlo Do” nena inmil tak a nih thu a sawi a. Mizoram chu India ram hmun pawimawh taka awm a nih thu leh ramri thui tak nei a nih thu sawiin, India ram pum tana kawngkapui vengtu leh mawhphurhna sang tak nei kan nih avangin kan inthlahdah thiang lova, beng chhi renga kan awm a tul a. Ruihhlo tawlh avanga hlawk thut duhna kan hnualsuat angai a ni, a ti bawk.

Larsap chuan ramri kaltlanga ruihhlo tawlh ven beihpui thlakna ‘Operation Jericho’ leh ruihhlo ngaite enkawlna ‘Hulhliap Short Stay Centre’ hmalaknate fakawm a tih thu sawiin, district leh state level Nasha Mukh Bharat Abhiyan leh Narco Coordination Centre (NCORD) te theihtawp chhuah zel turin a fuih a. Ruihhloin mizo thalai hna thawk rual, abikin mipa nunna nasa taka a suat chu veiawm a tih thu sawiin, ruihhlo beihpui thlakna tura ruahmanna siam chuan rah tha a thlen ngei a beisei thu a sawi a. Khua leh tui Dan zawm tha, khawtlang inlungrual leh NGO thawhpui nuam tak awmna Mizoramah ruihhlo do beihpui thlak nana ruahmanna duan chu a hlawhtlin ngei a beisei thu a sawi bawk.

Home Minister Mr. K. Sapdanga chuan hun hman chu ruihhlo laka Mizoram hmalam humhim tura thutlukna puan chhuahna, ram leh hnam humhim nana intiam tharna a nih thu a sawi a. Mizoram chu ruihhlo tawlhna kawng a nih thu leh thalai tam tak ten an tawrh phah thu sawiin, enforcement agency, NGO leh kohhrante nen kan zavaia kan tanrual a ngaih thu leh ruihhlo tawlhtu mai bakah a zawmpui dangte pawh chhui chhuaha tih chhiat vek a tul thu a sawi a. State Action Plan chu a taka puitlina tihhlawhtlin a nih theih nan mawhphurhna hrang hrang neite tun atanga theihtawp chhuah turin a chah a. Ruihhlo tawlh chhut chah nan a bik takin ramriahte nasa lehzuala chetlak tum a nih thu a sawi bawk.

Home Minister chuan January-August 2026 chhungin ND&PS Act hnuaiah case 635 ziah luh a nih thu leh hemi kaihhnawiha man 930 zinga 111 te ram dang mi an nih thu sawiin, ruihhlo kaihhnawih man hlut zawng belh khawm chu cheng vaibelchhe 846 chuang a ni a ti a. Ruihhlo zuarte chungah dan anga na taka hremna lekkawh zel a tul rualin ruihhlo ngaite an that chhuah leh theih nan dawhtheihna leh lainatna nena enkawl a tul thu a sawi a. Ruihhlo laka thalaite an fihlim theih nan zirna in ah drug awareness campaign kalpui uar lehzual a tul thu a sawi a. Ruihhlo laka fihlim ni tura Tlangmawi khaw mipuite tanrualna leh huaisenna fakawm a tih thu sawiin, ram pum tan thuchah ropui tak, ruihhlo laka zalenna an puanga, midang tana chona thianghlim tak an rawn chhawp chhuak a ni a ti. Thalaite chu an hmalam hun ruihhloin a tih chhiat loh nana intiam thar leh theuh turin a chah a. Nu leh pate pawh fate ngaihven tura chahin, NGO, khawtlang hruaitu leh kohhran hotute ruihhlo do kawnga lungrual taka tanrual puiah a sawm nghal bawk.