Khawzawlah ruihhlo Cheng Nuai 400 chuang man hu hal ral a ni
Vawiin khan Khawzawl District Drug Disposal Committee bultumin Krishi Vigyan Kendra (KVK), Khawzawlah Drugs halralna hun hman a ni a. Sub-Headquarters YMA President Pu PC Rosiama’n he hun hi a hmanpui a, Addl. Superintendent of Police Pu Zosangliana’n hun a kaihruai.
Khawzawl District Superintendent of Police Pu F. Lalbiakzauva chuan Khawzawla ruihhlo man kawngah Excise & Narcotics leh tlawmngai pawl YMA leh MHIP te nen an thawhho that zia sawiin, kuminah joint operation an neih te, Anti Drug Squad anga Drive an neih te, branch bil te tein hma an lak thu te a sawi a. Ruihhlo avanga an mi mante hi Court-a thiamloh chantir tur chuan civilian witness an awm a ngai tih sawiin, zankhaw tairek pawh pawisa lova witness-a tang thinte chungah lawmthu a sawi bawk a. Khawzawl Deputy Commissioner pawhin an thawhrimna hriatpuiin, ruihhlo do tura din Special Team member-ten DC hmalaknaa kumin Independence Day-a lawmman an dawng chu lawmawm a tih thu a sawi.
Sub-Hqtrs YMA President Pu PC Rosiama chuan ruihhlo do hi kan zavaia kan mawhphurhna a ni tih sawiin, vawiin programme hi ruihhlo do kawnga thawhhona tha zawk siamtu ni se a duh thu sawiin, drugs man a nih laia witness a tang thinte chu dan bawhchhetuten an phu tawk hremna an hmuh ngei theih nan court-a inlan a pawimawh thu a sawi a. Kan tu leh fate tan chenna leh seilenna tlak khawtlang siam tur chuan sawrkar, khawtlang hruaitu leh mipuite kan tanho a ngaih thu a sawi.
Vawiina Drugs hal ralte hi April 2026 leh June 2026 inkar chhunga man niin, Methamphetamine kg 1.972, Rs. 1,57,76,000/- man hu leh Heroin (No 4) kg 1.283, Rs 2,56,00,000/- man hu te a ni a, avaiin Rs 4,13,76,000/- (Nuai 413.76) man hu a ni. Heng ruihhlo man kaihhnawihah hian Khawzawl Police Station-ah case 15 ziahluh niin mi 17 man an ni.
