FCS&CA Minister-in Indane EXTRALITE NOW FTC gas cylinder a tlangzarh
Vawiin khan Food Civil Supplies & Consumer Affairs Department changtu Minister Pu B. Lalchanzova chuan State Guest House, Chaltlang-ah, Indane EXTRALITE NOW FTC Gas cylinder chu mipui vantlang hman theih turin a tlangzarh.
He hunah hian khuallian FCS&CA Department changtu Minister Pu B. lalchhanzova chuan thusawiin, IOCL ten englai pawha lei theih tura Indane EXTRALITE NOW FTC gas cylinder an chhawpchhuak ta chu lawmawm a tih thu a sawi a. Eirawngbawlna gas indaihloh avanga dan loa (black) gas lei thin chu hei hian a tihziawm a beisei thu sawiin, Minister chuan, Indane EXTRALITE NOW FTC gas cylinder chu Mizoram sawrkar hnuaia subsidy anga pek tur a nih loh avangin, a man pawh a leitute mamawh ang zel (market-based) a nih tur thu a sawi bawk a ni.
Pu B. Lalchhanzova chuan Indane EXTRALITE NOW FTC gas cylinder an tlangzarh avangin, Mizoram-in IOCL atanga gas cylinder an hmuh zat chu a tlem phah dawn loh thu sawiin, mipui ten eirawngbawlna gas lama harsatna an tawh lohna turin sawrkarin hma a lak zel thu a sawi bawk a. Minister chuan Mualkhang Gas bottling plant chu hman theih tura hma lak mek zel a ni tih sawiin, ni khatah gas bur sang riat vel siamchhuah theih tura ruahman a ni tih a sawi. Pu B.Lalchhanzova chuan Mizoram chu a awmna hmun a pawimawh avang te, ruahtui tlak tamna a nih avanga inkalpawhnaa harsatna a awm thin avang te leh KMMTTP kal zelah te, South Asia politics boruak inlumlet avang leh chhan dang dang vangin energy security neih a tul thu a sawi a, Mizorama oil depot bun a nih theih nan hma an lak mek thu a sawi bawk.
Indane EXTRALITE NOW FTC gas cylinder hi hman awlsam leh nuam zawk tura siam a ni a, gas cylinder pangngai aiin a zan zawk bakah, a chhung lang tlang thei tura siam a nih avangin gas tui awm zat a hmuh theih dawn a, hei vang hian refill hun tur pawh awlsam taka hriat theih a ni dawn a ni. Gas cylinder thar hi 10 kg composite cylinder (fiber glass) hmanga siam a ni a, tuiek (rust) ve lo tur leh kangmei chhuak thei lakah pawh him zawk tura beisei a ni.
Indane EXTRALITE NOW FTC gas cylinder hi hmang tura in-register leh refill duhte tan IndianOil ONE App leh IndianOil Customer website (cx.indianoil.in) atang te a tih theih tura ruahman niin, Whatsapp booking pawh tih theih tura hmalak mek a ni a. Vawikhat in-register man hi cheng 4900 vel niin, a refill man hi cheng 1800 vel ni tura ruahman a ni a. Tun dinhmunah chuan MIZOFED leh Vanbuangi agency ten an pe chhuak dawn a ni.
Vawiina tlangzarh inkhawmah hian Indian oil CGM (LPG), IOAOD SO Pu Amarjyoti Bordoloi leh FCS&CA Director Pi Saizikpuiite pawhin thu an sawi a. Pu Z. Lhungdim, State-level Coordinator chuan lawmthu sawiin hun hi a khar a ni.
