Deputy speaker pu lalfamkima’n zero point atanga bairabi kawngpui dinhmun a enfiah

Vawiin khan Mizoram Legislative Assembly Deputy Speaker leh 5-Kolasib (ST) AC bialtu MLA ni bawk, Pu Lalfamkima chuan Zero Point atanga Bairabi panna kawngpui thawm that mek dinhmun a hmunah kalin a enfiah.

Kawngpui enfiahtu Deputy Speaker Pu Lalfamkima chuan Bairabi kawng chu kawng tangkai leh pawimawh tak a nih thu a sawi a. He kawng chhia hi a vei hle thin thu sawiin, hun rei tak inenkawla a awm avangin a hma lamin a tlawh thei lova, a theih veleh a hun neih hmasa berah a rawn tlawh nghal a ni, a ti. Kawng a that theih nana theih tawp chhuahtu PWD Department te chungah lawmthu sawiin, kawng chhia avanga harsatna hun rei tak lo tuar tawhtu, kawng dunga khaw mipuite hriatthiamna a dil bawk a ni.

Tun dinhmunah fur ruah sur a nasat avangin contractor ten an duh angin hna an thawk thei rih lova. Chuvangin, mipuite tlan tlang theih nan kawng chu a ‘single lane’ chin tal thawm that phawt nise, a khuar zual laite lunga hnawh khat turin Deputy Speaker chuan a chah a . Ruahsur chhung hian balu phur lirthei tlan dangchat tawp lova, company-in lirthei ‘body’ capacity a pek aia tam phur lo tura a duh thu a sawi bawk a ni.

He hunah hian Executive Engineer, PWD (NH) Division-III hnen atangin Bairabi kawng siam hna (project) chungchang report ngaihthlak a ni a. He kawng siam hna atan hian sawrkarin cheng nuai 2,752.82 a ruahman (sanction) a. A chhang hniam bertu Tanor Engineering te hnenah cheng vaibelchhe 15.94 in hna hi pek niin, June ni 30, 2025 khan an thawk tan a, thla 11 chhunga zo tura contract ziah a ni.

Amaherawhchu, contractor te hnathawh hi a chhe hle a, hun tiam chhungin an thawk zo thei lo tih tarlan a ni. Hemi avang hian Mizoram sawrkar pawhin Monsoon Damage Repair Fund atangin kawng chhia thawm that hna atan Rs. 34,01,800/- a ruahman belh a, he sum atang hian kawng siamna tura lung lakkhawm leh supply hna thawh mek a ni tih report a ni.

Deputy Speaker Pu Lalfamkima kawng enfiahna ah hian sawrkar mi pawimawh leh tlawmngai pawl hruaituten an tawiawm a. Chungte chu – Executive Engineer, PWD (NH) Division-III; Pu Chinlianmanga, EO & SDO(Civil) Bairabi; Pu David A. Lalhmingchhuana, DIPRO, Kolasib; Tanor Engineering aiawhte, MJA Kolasib aiawhte leh President/Secretary, Sub-Hqrs YMA, Kolasib te an ni.