Chief minister-in madebymizo kiosk hawng
Zirtawpni khan Mizoram Handloom & Handicrafts Development Corporation Ltd. (ZOHANDCO) hmalakna a din MadebyMizo Kiosk, 102 Humayunpur, Safdarjung Enclave, New Delhi a mi chu Pu Lalduhoma, Chief Minister chuan a hawng.
MadebyMizo Kiosk hi Mizo thilsiam hrang hrang zawrhna dawr a ni a, Ministry of MSME, Government of India hnuaia scheme pakhat RAMP hmang a din a ni. ZOHANDCO chu he scheme-ah hian State Nodal Agency (SNA) niin, he scheme hnuaia component pakhat, Marketing Intervention bikah mawhphurhna a la bawk a ni.
Marketing Intervention hnuaiah hian ZOHANDCO chuan MadebyMizo.com (e-commerce) platform a lo launch tawh a. He e-commerce-a Mizote siamchhuah bungrua an ziahluhte chu a taka zawrhchhuah a nih theih nan MadebyMizo Kiosk hi din a ni. New Delhi bakah hian Bengaluru leh Kolkata-ah te din turin ZOHANDCO chuan hmalakna a kalpui mek.
Heng Kiosk a tang hian bungrua hralh chhuah an ni ang a. Tin, e-commerce atanga online order awm te, Aizawl atanga thawn vek lovin, heng kiosk atang te hian an pechhuak thei dawn a ni. MadebyMizo Kiosk 750 sq ft a lian a ni a, a din nan hian Rs. 71.41 lakh hman a ni.
A hawnnna neih hnuah Kidang Restaurant, Safdurjung Enclave-ah Chief Minister’s Grand Dinner neih chhunzawm a ni a. He hunah hian Chief Minister chuan, Mizorama PSU te chu sorkar tan phurh rit ni thin an ni a, kan sorkar hnuah siamthat hna nasa takin kan thawk a, tunhnai a ZOHANDCO hmasawn dan hian chu chu a lanchian tir hle a ni, a ti.
