Art & Culture Minister Pu C.Lalsawivunga’n khawvel puma Tualto Hnamte Ni lawmna programme Vanapa Hall-ah a hmanpui
Vawiin khan khawvel puma Tualto Hnamte Ni (International Day of the World’s Indigenous Peoples) lawmna chu “Indigenous Peoples and AI: Defending Rights, Shaping Futures” tih thupui hmangin Vanapa Hall-ah hman a ni a, he programme hi Zo Re-unification Organization (ZORO) chuan a buatsaih a, Art & Culture Minister Pu C. Lalsawivunga chuan khuallian niin a hmanpui.
Art & Culture Minister chuan United Nations (UN)-in tualto hnamte a ngaihpawimawh thu sawiin, August ni 9 chu International Day of the World’s Indigeneous People atan December ni 23, 1994-ah resolution no. 49/214 a pass tawh, a ti a. British ram atanga zalenna India ramin a hmuh hnuah Zofate chu ram hrang hrangah thendarh kan nih thu a sawi a. Political boundary avangin ram hrang hrangah Zofate kan awm mek a, ramriin min daidang mah se Zo hnahthlak unau kan nihna erawh chu ramriin min then hrang lo se, kan thinlungah Zofa kan ni tih hi vawn tlat a pawimawh, tiin Pu C. Lalsawivunga chuan a sawi a. Ram hrang hrang, sawrkar hrang hrang hnuaiah Zofate chu awm mah se, mahni awmna hmun atang theuh Zofa kan nihna identity hre reng chunga inpumkhatna leh inunauna nghet lehzual nei chunga hma lam pan zel turin kalkhawmte chu a fuih bawk.
Pu Robert Romawia Royte, MLA, pawhin khualzahawm niin thu a sawi a. Zofate chu an identity-a chiang tur leh chi bil leh hnam bil theuh nei mah ila, insuihkhawma inunauna nei zel turin kalkhawmte chu a chah a. Khawvel thang zelin a ken tel technology leh social media-te chu hmang tangkaia, insuihkhawmna hmanrua atan hmang zel turin a fuih bawk a ni.
ZORO President Pu R. Sangkawia chuan thu sawiin, Zoram a tir atanga luahtu hi Zofate kan ni a, a ram neitu (indigenous people) pawh Zofate kan ni, a ti a. UN pawhin Indigenous People-te tana thupuan article 46 zet an siam thu leh Zo hnam pawh hi Indigenous People-a pawm kan nih thu a sawi bawk. Kan pi leh pu ten duat taka an lo enkawl leh hnam dang lak atanga an lo venhim thin Zoram hi hmangaih taka enkawla, venghim zel turin Pu R. Sangkawia chuan kalkhawmte chu a chah a ni.
