Chief Minister-in Bana Kaih CM Special Package semna leh Drug Treatment Centre 21-te hnenah Accreditation Certificate leh GIA hlanna telpui
Vawiin khan MLA Conference Hall, Assembly Annex, Aizawlah Social Welfare, Women & Child Development (SW,WCD) Department bultumin Bana Kaih (Handholding Policy) hnuaia Progress Partner-te hnenah CM Special Package pek an ni a, Accredited Drug Treatment Centre-te hnenah Accreditation Certificate leh Grant-in-Aid (GIA) pek chhuah a ni bawk. He hun hi Chief Minister Pu Lalduhoma chuan khuallian niin a hmanpui a, SW,WCD Minister Pi Lalrinpuii chu khualzahawm a ni.Thu sawiin Chief Minister chuan, thalai tam tak ruihhlo sala an tan mek avangin chhungkua leh khawtlang a nghawng nasa a, nun kawng pangaia an kir leh theihna turin kawng hrang hrangin hma kan la a, kohhran, tlawmngai pawl leh rinna behchhana Rehabilitation Centre/Home hrang hrangte an thawkrim hle bawk a. Kan tangkaipui hle.
Ruihhlo zawrh leh thehdarh dona kawngah hma nasa takin kan la bawk a. Mizorama security agency zawng zawngte nen kan tangho a, operation te kan kalpui a. Ruihhlo kan man nasat avangin a vang tial tial a, a man pawh a to sawt hle a ni. Ruihhlo dona kawngah hian kan tlawmngaipawlte an tangkai em em a ni.Vawiina hun kan hman chhan ber chu humsual dai leh ruihhlo ngaite chawmdawlna hna thawk tu Center-te an inenkawlna tur pek leh thawk chhunzawm zel thei turte thlanchhuah a ni a. Heng hna hi rawngbawlna anga ngaia thawh chi a nih avangin mi zawng zawng thawh theih pawh niin a lang lo va. Kohhran leh Pathian kohna dawngten tha takin an kalpui hlawm a. Anni nen hian sorkar chuan thawhho tha kan ti a, ruahmanna pawh kan siam a ni.Ruihhlo bansan a, nunphung pangaia kir mi eng emaw zat hnenah CM Special Package kan han pe bawk a. Hei hi thil chhinchhiahtlak tak niin ka hria. A dawngtute hmel ka han en a, Hulhhliapa in awm lai nena khaikhin chuan in hmel hmuh a nuam ta hle mai. In taksain nasa takin hma a sawn tih a lang a ni.
Vawiina bul in tanna tur sum leh pai kan pek che u hi a beitham a. Nimahsela, tha taka hmanga eizawnna lama hmasawnpui lo tum tlat ula kan duh khawp mai. Vawiina mite hi a bultantute in ni a, hna in thawh that chuan nangmahni anga nunkawng dik rawn zawhtute tan entawn tur tha tak in ni dawn a. A hlu hle dawn a ni, a ti.Khualzahawm Minister Pi Lalrinpuii pawhin thu sawiin Mizoram sawrkar hnuaiah ruihhlo ngai, nun kawng dik zawha hawikirte hmakhua a en thu sawiin, an banah sawrkarin kaih a inhuam a ni, a ti a. Vawiina Progress partner mi 33-te Chief Minister ngeiin financial Assistance hi hlan se an duh chhan sawiin, “Chief Minister hian an bana kaih ngaite chu kan kai ang tiin a sawi thin a, ruihhlo ngai dam leh te hi an bana kaih ngaite chu an ni a. A takin vawiinah amah ngeiin a kai ta a ni, a ti. Progress Partner-te chu an thil dawn te an dawn chhan ang taka hmang tur leh midangte tan malsawmna ni turin a chah a ni. He hun hi SW, WCD Commissioner & Secretary Pi Lalzarmawii’n a kaihruai a, MSD&RB Board Member Pi Vanlalhruaii leh SW,WCD Joint Secretary Pi Zonuntharite hnen atangin report ngaihthlak a ni a. Dr. Lalbuatsaiha hnenah chawimawina hlan a ni bawk. Dr. Lalbuatsaiha hi midel niin tunhnaiah PhD Degree a hmu a ni.Progress Partner-te hnenah CM Special Package pekna leh Accredited Drug Treatment Centre-te hnenah Accreditation Certificate leh Grant-in-Aid (GIA) pekna neih a ni bawk a. Social Welfare Director Vivek Kumar Tripathi chuan lawmthu sawiin inkhawm hi a khar a ni.
