Lungleiah MzSRLM Lunglei BMMU huaihawtin Block Mela 2026 buatsaih a ni
Mizoram State Rural Livelihoods Mission (MzSRLM), Lunglei Rural Development Block hnuaia Block Mission Management Unit (BMMU) bul tuma Lunglei Chanmari-a District Agriculture Office tuala Block Mela, 2026 buatsaih chu tukin zingkar khan Block Mission Director/Block Development Officer, Lunglei RD Block Pi Grace Lalremdiki Sailo chuan a hawng.
Pi Grace Lalremdiki Sailo chuan Block Mela buatsaih chhan ber chu Self Help Group (SHG) member-te’n anmahni kutkawiha an thil siam leh thar chhuah te mipui hnena man tlawm zawka an hralh chhuah theihna tura remchang siamsak a nih thu a sawi a. Block chhung khaw hrang hrang aṭanga inpho chhuak SHG member-te chungah lawm thu sawiin, Mela hi ngaih pawimawhsak tur leh bazar ṭheuh turin mipuite a sawm nghal.
Lunglei Block Mela, 2026-ah hian khaw paruk aṭangin SHG pasarih leh member pariat inpho chhuakin, stall pasarih siam a ni a. SHG-te kut chhuak – puan leh kut themthiam thil chi hrang hrang te, an thar chhuah thlai hnah leh thlai rah chi hrang hrang te, thei rah leh thei tui te, aieng, hmunphiah leh ei leh in chi an siam chhuah hrang hrangte lei theih tura chhawp chhuah a ni a. Mipui pawhin an hlut hle a. Item hrang hrang hralhna aṭang hian cheng nuai 1 chuang (₹1,01,230/-) hmuh a ni.
