Chief minister hovin mi- pragati meeting neih a ni
Vawiin khan Chief Minister Pu Lalduhoma kaihhruaiin Mizoram Pro-Active Governance and Timely Implementation (Mi-PRAGATI) meeting neih a ni a. Hei hi an thutkhawm vawi lina a ni. Aizawl Western Side By-Pass Road laih meka harsatna awm mek Dumping site chungchang te, zangnadawmna la tihfel lohte, Refugee-te awmna sawn chungchang te, Forest Clearance chungchangte an sawiho a. Meeting hmasa lama an lo sawi tawh vawiin thlenga an bawhzui tawh chinte an report a. Tih tur la awmte chu chak taka bawhzui zel ni se, an ti.
Hnathawh dan tur tihdanglam ngai (change of scope) awmte pawh an sawi lan a ni. Vairengte – Sairang Section of NH 306 & 06 (Four lane) hmalak mek pawh an thlirho a. Meeting vawi thumna leh vawiin inkarah hna hi zaa pahnih (2%) a hmasawn hman a nih thu tarlan a ni. Tun thlengin Package 3 chinah hna hi 19.25 % zawh tawh a ni a, package 4 ah 17.82 %, package 5 ah 14.90 %, package 6 ah 8.76 %, package 7 ah 13.67 % leh package 8 ah 14.12 % te thawh tawh (physical progress) a ni a.
Hmun thenkhatah ram neitu nih inchuhna Court thubuai a awm a. Court thutlukna nghah mek a ni. Tuna kawng awmsa hi Short Term Maintenance Contract hmanga siam mek a ni a. Hnathawh turte hi an thawk zo tep tawh a ni.
