Minister Pu C Lalsawivunga’n MSU buatsaih Mizo Under Graduate topper-te chawimawina hun a hmanpui
Vawiin khan MSU General Headquarters chuan Mizo Under Graduate Topper mi-24 te lawmpuina hun Zonuam-a Woodland Hills Auditorium-ah an hmang a. He lawmpuina programme-ah hian Minister Pu C Lalsawivunga chu khuallian niin , Mizoram Rural Bank Senior Manager (FI) Pu V Lalrinmawia chu khualzahawm a ni.
Khuallian Pu C Lalsawivunga chuan zirlai chawimawite chu an taimakna, tumruhna leh tih tak takna an neih avanga hlawhtling an ni tih thu sawiin, an hma hunah chhawr tlak ni turin theihtawp chhuah lehzel turin a fuih a. Minister chuan Mizo thalaite chu All India Sevice-ah lut an tam tawk lo chu pawi a tih thu sawiin, thalai tam zawk chuan UPSC leh SSC exam-te ngaihven thar a, heng exam-ah an tlin ngei theih nan theihtawp chhuah zel turin a fuih bawk a ni.
Khualzahawm Pu V Lalrinmawia chuan vawiina MSU-in zirlai hlawhtling te lawmpuina hun an buatsaih chu lawmawm a tih thu sawiin, Mizo thalaite chu a tam thei ang ber Banking Service-ah lut turin a sawm bawk a ni. MSU President Pu B.Lalkhawngaihzuala chuan gold medalist panga(5) zingah Mizo pali (4) lawmpui tur an awm chu lawmawm a tih thu sawiin, zirlaite chu ram leh hnam hmangaih a, aia upa te zahthiam tur leh an thiamna hmanga zonun zemawi chawi nung zel turin a chah a ni.
