MSHCS CEO Dr Lalhriatzuali Ralte chuan Lungsen PHC a tlawh
Nimin khan Mizoram State Health Care Society (MSHCS) Chief Executive Officer (CEO) Dr Lalhriatzuali Ralte chuan Primary Health Centre (PHC) Lungsen tlawhin, damdawi ina inenkawlna senso chhawk zangkhaina Mizoram Universal Health Care Scheme (MUHCS) leh Ayushman Bharat–Pradhan Mantri Jan Arogya Yojana (AB–PMJAY) kalpui chungchanga PHC dinhmun a enfiah.
MSHCS CEO Dr Lalhriatzuali Ralte hi Lungsen Block Development Officer (BDO) Pu Lalhruailiana Zote leh Lunglei Sub-Deputy Commissioner Pu Lalruatfela te’n ṭawiawmin, Lungsen PHC-a Medical Officer Dr Lalremruati hovin PHC-a thawktute’n an lo dawngsawng a. PHC hmunhma leh pindan hrang hrang fang kualin, mahnia awlsam taka hriselna dinhmun endik theihna Health ATM chu a en bawk.
Dr Lalhriatzuali Ralte chuan thawktute nen MUHCS leh AB-PMJAY kalpuina kawng leh hriselna kaihhnawih hma lakna hrang hranga Lungsen PHC dinhmun leh harsatna te sawi hovin, an mamawh leh hriselna kawnga hmasawnna atana thil pawimawh hrang hrang te an sawi ho bawk a. Mipuite an damloh nikhuaa an damdawi in awmna senso chhawk zangkhai tur leh sum seng lova an inenkawl theihna tura Mizoram sawrkarin MUHCS a ruahman leh sawrkar laipui ruahmannaa AB-PMJAY kalpui te chu a mamawhtu mipuite’n an chhawr ṭangkai zel theih nan theih tawp chhuah turin PHC Lungsena thawktute leh official-te chu a chah.
