NER Inter-Group Band Competition 2026 chu Lammualah neih a ni
Vawiin khan NCC North Eastern Region (NER) Directorate hmalaknain, Group Headquarters, Aizawl hnuaia 20 Mizoram Battalion NCC, Aizawl chuan ‘NER Inter-Group Band Competition 2026’ chu Lammual, Aizawl-ah a vawi khatna atan an thleng. He hun hi NCC North Eastern Region Additional Director General (ADG) Major General Anurag Vij chuan Khuallian niin a hmanpui a ni.
He inelna hi New Delhi-a Republic Day lawmna huna Republic Day Camp (RDC)-ah North Eastern Region Directorate aiawh tur NCC band thiam ber thlang chhuak tura buatsaih a ni a. He inelnaah hian Assam, Meghalaya, Nagaland, leh Mizoram atangin band hrang hrang an tel a, heng cadet-te hian ni 4 July 2026 atang khan STC, Tanhril-ah training khauhtak an lo nei tawh a ni.
He hunah hian Aizawl, Kohima, Guwahati, Shillong, leh Tezpur Group aiawhin NCC band contingent pasarih (7) zet an tel a, Judge-te hmaah an rimawi thiamna te, rual taka an chet dante, tum ruhna leh thawhhona tha an neih dante atanga teh an ni.
Inelna neih zawh hnuin 20 Mizoram Battalion NCC (Aizawl Group) Pipe Band te chu NCC NER Inter-Group Band Competition 2026-ah hian pakhatna niin, New Delhi-a Republic Day Camp lo awm turah NCC North Eastern Region Directorate aiawh tura thlan an ni.
