Myc chairman-in rawpuichhip yma day lawmna hmanpui
Pu Malsawmzuala Ralte, Chairman, Mizoram Youth Commission (MYC) chuan vawiin khan Rawpuichhip YMA Day lawmna Khuallian niin a hmanpui. Rawpuichhip YMA hian kumin YMA day lawmna thupuiah “Ruihhlo Do” tih an hmang a ni.
Khuallian MYC Chairman Pu Malsawmzuala Ralte chuan Sawrkarin ruihhlo do kawngah theihtawp a chhuah thu sawiin, Excise & Narcotics, Police, CID leh SIB te tha taka thawk hovin ruihhlo tihrem kawngah tha an thawh nasa hle a ni, a ti a. Ruihhlo leh a kaihhnawih do kawnga YMA hmalakna fakawm tiin, theihtawp chhuaha Sawrkar tawiawm zel turin a sawm a. Ruihhloin a tihbuai thalaite enkawlna Hulhliap Short Stay Centre, Synod Camping Centre camping chhawng 9 buatsaih a ni tawh tih sawiin, camper 2200 vel an enkawl atanga zaa 30 vel zetin ruihhlo an la nghei chhunzawm zel thu a sawi a.
Ruihhlo la ti ve lo naupang leh thalaite venhim a tul thu sawiin, inchhungkhur, sunday school leh school-ahte tichhin lova fihlim tura inzirtir a tul thu a sawi bawk. Inkhawm hi Pu H. Vanlalzapa, Branch YMA President-in a kaihruai a, Pu HB Lalfakawma, VCP-in thu a sawi bawk.
