Disaster Management & Rehabilitation Minister in X-Band Doppler Weather Radar Lungphum a Phum
Disaster Management & Rehabilitation (DM&R) Minister Prof. Lalnilawma chuan vawiin khan MINECO Conference Hall Number 1 ah Indian Meteorological Department (IMD), Ministry of Earth Sciences, Government of India buatsaih, ‘X-Band Doppler Weather Radar’ lungphum a phum.
Minister Prof. Lalnilawma chuan vawiin chu ni chhinchhiah tlak tak a nih thu a sawi a. Mizoram chu hmun nuam tak a nih piah lamah chhiatrupna thlen nasatna a nih avangin khaw chin hriat lawkna khawl chu a mamawh ber te zinga mi a ni, a ti. Tunlaiah information hmangin ram hrang hrang an intlansiaknaah information ngah ramte chu ram chak an ni zel a, chuvang chuan Mizoram pawhin he radar system hmang hian khaw chin hrilhlawkna (information) chipchiar zawk a nei thei ang a, inpuahchahna tha zawk neiin nunna tam zawk chhan a nih phah ngei a beisei thu a sawi.
Pu Udit Prakah Rai, DM&R Secretary pawhin thu sawiin, khuarel chhiatna lo thlena invenna leh hmalakna chu department pakhat mai ni lovin agency hrang hrang te thawhona a pawimawh thu sawiin, IMD chu khawchin dik leh fiah tak report thin turin a ngen a ni.
He radar hi North-east region-ah khaw chin hriatlawkna atana hman tur niin, khuarel chhiatna laka invenna kawngah te, kut hnathawk te leh thlawhnaa zin veivak te tana hman tangkai theih tur a ni.
Doordarshan Campus Durtlang Aizawlah he khawl hi bun tur a ni a. Cheng vaibelchhe 10 senna tur he project hi June ni 1, 2026 khan thawh tan niin, October ni 9, 2026 ah zawhfel hman tum a ni.
