Health Minister & Lunglei East Bialtu MLA Pi Lalrinpuii’n a bial chhunga National Highway kawngpui siam mek a enfiah
Mizoram sawrkara Health & Family Welfare Minister leh Lunglei East bialtu MLA Pi Lalrinpuii chuan vawiin khan a bial chhung Lungpuizawl, Zobawk North leh Zobawk South huam chhunga National Highway kawngpui siam ṭhat hna thawh mek chu tlawhin, hna thawh mek dinhmun leh mipuiin harsatna an tawhte chu District thuneitute nen a hmunah an enfiah.
Minister Pi Lalrinpuii hi Lunglei District Bawrhsap Pi Navneet Mann, Assistant Commissioner (Revenue) Pi Jennifer Vanlalhruaii Pachuau leh Lunglei Municipal Council (LMC) Ward No. 11-na Councillor Pu Vanlalliana Pachuau te’n an ṭawiawm a. NHIDCL General Manager, BRN Company General Manager, Zobawk North, Zobawk South leh Lungpuizawl Local Council te bakah, Joint YMA Zobawk te leh party hruaitute’n an lo dawngsawng a. Kawng dinhmun en hovin, harsatna awmte leh a chin fel dan turte an sawi ho nghal.
Minister Pi Lalrinpuii chuan kawngpui siam hna thawh danah mipuiin harsatna an tawh nasat avanga tlawh a nih thu a sawi a. National Highway kawngpui siam mekah hian ruahtui a tlak tawh avanga hna la thawh ṭan loh avanga harsatna te, zangnadawmna (compensation) lak loh avanga ram buai te, compensation pek fel tawh, mahni chenna in la chhuahsan loh avanga hna thawh khaihlak te leh compensation lak dana lungawi lohna te chu harsatna tlangpui a ni a. Minister chuan District thuneitute leh hna thawktute chu harsatna chin fel dan tur hrang hrang a ṭul anga chak zawka ngaihtuah turin a chah.
