Women & Child Development Minister Pi Lalrinpuii’n Lungleia Working Women’s Hostel sak lai mek a enfiah
Tukin zingkar khan Social Welfare, Women & Child Development Minister Pi Lalrinpuii chuan Lunglei Ramthar Venga Working Women’s Hostel (WWH) sak lai mek chu a hmunah kalin a enfiah.
Women & Child Development Minister hi Lunglei High Powered Committee (HPC) Vice Chairman Pu V. Malsawmtluanga bakah, Lunglei Municipal Council (LMC) Vice Chairman Pu K. Lalrinawma, Councillor Pi Malsawmkimi Khawlhring leh official-te’n an ṭawiawm a. Hna thawktute’n lo dawngsawngin, building sak lai an en ho bakah, an hna thawh dinhmun leh an harsatnate Minister hi an lo hrilhfiah.
Working Women’s Hostel hi hmeichhia mahni in luma awm lo va, hmun danga hna thawkte him leh dam taka an hna thawhna hmuna an kal theih nan leh nu nau pawmte pawhin thlamuang taka an kalsan theih nana nau awmna (creche) pawh awm tel thei tura Ministry of Women & Child Development-in a ruahman a ni a. Lungleia WWH hi SASCI Project hnuaia sum hmuh aṭanga sak niin, mi 50 leng thei tura sak tur a ni a. A pum pui sak zawh nan hian cheng vaibelchhe 14.09 ruahman niin, tunah hian 1st Installment cheng vaibelchhe 9.29 dawn tawh a ni a. Public Works Department (PWD) enkawlna hnuaiah AIE Construction, Tuikhuahtlang te’n a sak hna hi an thawk.
Building sak hna hi April 14, 2025 aṭang khan bul ṭan niin, duh angin hna a kal chak thei lo va. Hna thawktute chuan in sakna bungrua, a bikin rawra lak khawmna kawngah harsatna an tawh thu sawiin, chuti chung chuan theih tawp an chhuah thu a sawi a. Kum khat chhunga sak zawh tura ruahman chu an sak zawh a beisei awm loh chungin, Minister chuan ṭha tak leh a rang thei ang bera sa zo tura hma la turin a chah a ni.
