Health Minister Pi Lalrinpuii’n Serchhip A Tlawh
Vawiin khan Health & Family Welfare Minister Pi Lalrinpuii chuan Serchhip tlawhin, District Hospital Serchhip, Mercy Hospital leh Health Department hmalakna hrang hrangte tlawh a, District Medical Superintendent Dr. ZD. Lalmuanawma leh a thawhpuite’n an lo dawngsawng a ni.
Health Minister Pi Lalrinpuii chuan District Hospital Building thar sak mek a ni chu lawmawm a tih thu sawiin, chak zawka sak hna pawh thawh theih dan tur a ngaihtuahpui thu a sawi a. Mipuite mamawhna sang tak Serchhip District Hospital-a Doctor indaih lohna awm thin te, Technician, Nurse leh thawktu dang indaih lohnate pawh tih ziaawm pawh tih ziaawm a nih theih dan tur te, 3D Dental Clinic tih changtlun dan turte bakah damlote mamawh hrang hrang, thawktute’n an lo thlente sawi ho a ni.
Vawiin vek khan Serchhip Hospital sak thar chungchangah Serchhip Sub Hqrs YMA hruaitute nen, inkawmna a nei bawkin, chak zawka hna thawh a nih theih nana hma lakpui tur an ngennate a ngaihthlak sak a; CSR fund chungchangah Power Grid Corporation of India Limited lamin MoU an la ziah fel theih loh thu sawiin, Mizoram sawrkar lam chuan an tih tur chin an tih fel vek tawh thu a sawi a, Power Grid lamah pawh chak taka bawhzui zel a tum thu a sawi bawk. Hei bakah hian NESIDS atanga sum hmuh turte pawh hmuh thuai a nih theih nan thuneitute hnenah bawhzui a nih tur thu a sawi bawk. State Integrated Rehabilitation & Care Centre, Mental Health & Disability Care (rualbanlote leh rilru lam buaite enkawlna hmun bik) Mizoramah neih ve ni se tia an thlen chungchangah pawh Minister chuan, Aizawl district-ah chauh ni lo, district tina dah tura hmalak mek a nih thu a sawi bawk a ni.
Health Minister hian vawiin vek khan New Serchhip Bazar Veng-a Mercy Hospital (Rural Diagnostics & Research Centre) pawh tlawh nghalin, Hospital Ward/Cabin hrang hranga dam lote tlawh kual a; New Serchhip khawtlang hruaitute nen inkawmna nei zuiin, mipui vantlang hriselna kawnga hmalakna tur leh Urban Primary Health Centre leh Sub-Centre te tih hmasawnna tur leh mipuite tan tangkai leh zuala hman a nih theih dan turte sawi ho a ni.
