Union Minister of State Pu Tokhan Sahu chuan Champhai District a tlawh
Union Minister of State for Housing & Urban Affairs Pu Tokhan Sahu chuan vawiin khan Champhai a tlawh a, DC Office buatsaihin Champhai Circuit House-ah sawrkar hotute leh khawtlang hruaitute nen hun a hmang.
Minister Pu Tokhan Sahu chuan Champhai hmun mawi tak a rawn thleng thei leh hetiang hun tha leh hlimawm tak an lo buatsaih hi lawmawm a tih hle thu a sawi a, inpumkhatna pawimawh zia sawiin India ramah hian hman atang tawhin inpumkhatna pawimawh zia kan sawi tawh a, kan hnam leh nihna hi hluta hrechiang chunga India ram mi dang te nena inpumkhatna vawng nung turin a chah. Tun sawrkar hian North East hi a ngai pawimawh em em a, hmalakna hrang hrang a awm a, hna pawh thahnem tak thawh tawh a ni tih a sawi a, One India siam hi an tum ber a ni tih sawiin Prime Minister thiltum a hlawhtlin theih nan heta sawrkar hnathawkte tha taka thawk turin a sawm a, mipui pawn he One India – India inpumkhatna siam thei turin tan la zel turin a chah bawk a ni.
A lawmna hun hi Addl. DC Pu Lalbiakfela’n a kaihruai a, Champhai Vengthlang Cultural Troupe te’n lam an hmuh a, intihhlimna hun hman a nih hnuah District Urban Development Officer (DUDO) Ngulzathuama’n lawmthu sawiin hun a khar a ni.
Programme zawh hian Minister Pu Tokhan Sahu chuan Pradhan Mantri Awas Yojana – Urban (PMAY-U) leh Deendayal Antyodaya Yojana – National Urban Livelihood Mission (DAY-NULM) hnuaia hamthatna dawngtute nen inkawmna hun a hmang a ni.
