NMBA Hriselna Kutpui kharna Hun Hman A Ni

Ni hnih awh NMBA Hriselna Kutpui chu vawiin chawhnu khan, a kharna hun DC Pisapui hall, Serchhipah hman a ni. Kut kharna inkhawm hi SDO (Sadar) Pi Rebecca Laldinmawii Hrahsel-in a kaihruai a, Deputy Commissioner Pu Paul L. Khuma chuan Khuallian niin hun a hmanpui.

Serchhip Deputy Commissioner Pu Paul L. Khuma chuan NMBA-Hriselna Kutpui huaihawt a nih chhan a sawi a. Serchhipa Doctor indaih lohna avanga mipuite’n harsatna an tawh thinte, chhawk zangkhaina tura he NMBA-Hriselna Kutpui hi buatsaih a nih thu sawiin, tih hlawhtlin a nih theihna tur atana hun leh tha sengtu zawng zawngte chungah lawmthu a sawi a, he hun hmanga kalkhawm mipui leh zirlai rualte chu khua leh tui tha, rilru leh taksa hriselna ngai pawimawh mi nih tum theuh tur leh mi dangte tana malsawmna ni tura nun kawng dik zawh theuh turin a fuih a ni.

NMBA-Kharna inkhawmah hian he Kut puala buatsaih Inter-School Public Speaking Competition-a ti thate hnenah lawmman sem niin, an hun hlu tak senga mipuite rawn theih tura rawn thu chhuak Doctor-te hnenah Serchhip Deputy Commissioner chuan lawmman thilpek a hlan bawk a ni.

Inter-School Public Speaking Competition hi Serchhip District chhunga High School leh Higher Secondary School zirlaite tana buatsaih niin, School hrang hrang 10 atangin zirlaite an intihsiak a, a pumpuiah Samuel Lalramchhana, Millenium High School, Chhiahtlang chu pakhatna niin, Lalhunmawii, Brilliant Higher Secondary School, Serchhip chu pahnihna ni a, R. Lallianpuia, Sainik School, Chhingchhip chu pathumna a ni. Lawmman latute hnenah hian tangkafai leh Certificate pek an ni. Sub Deputy Commissioner Pi Lalchhanhimi’n lawmthu sawiin hun hi a khar a ni.

NMBA-Hriselna Kutpui hi mipuite’n an hlut hle a, Serchhip Doctorte bakah Aizawl atangin natna hrang hranga thiam bikna nei Doctor rualte chahchhuah niin, a ni khatnaah (14th May) inentir tura hming ziak mi 672 awmin, a ni hnihna-ah mi 789 zet an awm a ni.