Mizoram Larsap-in Sainik School, 14 Assam Rifles leh Shalom Special School-te a tlawh
Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan lehlangin Serchhip District a tlawh. Larsap hian Sainik School Chhingchhip, 14 Assam Rifles Serchhip leh Shalom Special School, Serchhip te tlawhin zirlai, zirtirtu, ex-servicemen leh sipaite kawmin hun a hmang a ni. Sainik School Chhingchhipah hian Brig. Puspendar Sorayan, DIG, 23 Sector Assam Rifles leh Vice Principal Lt. Col. Kartik Sood, AEC ten Larsap hi an lo hmuak a. Zirtirtu, staff leh zirlaite fuihna thu sawiin, Sainik School Chhingchhip atanga zir chhuak zirlai pahnih ten National Defence Academy (NDA) a lut thei tura exam an paltlang chu lawmawm a tih thu sawiin, an kalzelna turah duhsakna a hlan a. Tunhnaiah Sainik School-in hmasawnna hrang hrang a hmu chu lawmawm a tih thu sawiin, Principal, zirtirtu leh staff-te chu theihtawp chhuah chhunzawm zel turin a chah a ni.
General (Dr) Vijay Kumar Singh chuan Sainik School chu mi tha leh danglam bik chher chhuahna tur hmun a nih thu sawiin, Armed Force-ah lut vek lo mahse, an kalna zawn theuhah chhawr tlak leh danglamna thlentu nih tum turin a fuih a. Ramin thalai nakin lawka hruaitu tha ni tur a mamawh tih sawiin, zirlaite chu danglam bik nih tum tur leh sang tak thlen tum turte, inthununna tha nei tur leh hlawhtlinna chang thei tura inpekna nunpui tlat turte, khawtlang leh ram tana chhawrnahawm tak nih tum turtein a chah a ni. Vawiin vek khan Larsap chuan 14 Assam Rifles Headquarters, P&E Veng, Serchhip chu tlawhin, Commandant Col. Archit Goswami, SM chuan an hmalak dan a hrilhfiah a. Ex-Servicemen member, Govt. Serchhip College zirlai leh sipaite a kawm a. Zirlaite chu ruihhlo leh a kaihhnawih laka fihlim tum tur leh eng hna pawh thawk se, rinawm leh taima taka thawk turin a chah a ni.
Hemi hnu hian Shalom Special School, New Serchhip tlawhin board member leh zirlaite a kawm bakah ei leh in tur a ken sakte a hlan a. Principal Pi A. Lalawmpuii hnen atangin school chanchin leh enkawl dan tlangpui ngaihthlak a ni a. Larsap leh Assam Rifles ten kawng engkima an ngaihtuah thin avangin lawmthu a sawi a. Shalom Special School tana a thawh hlawk em avangin Larsap hi chawimawina thuziak cheimawi an hlan nghal bawk. Shalom Special School, Serchhip hi August ni 17, 2005 khan Chief Minister hlui Pu Lal Thanhawla’n a din a. Tuna an school building ni ta sakna tur lungphum hi Mizoram Larsap hian Eastern Army Commander a nih lai, January 2010 khan a phum sak a, 4th Assam Rifles te’n Military Civic Action kaltlangin an sa a ni. Tun dinhmunah Shalom Special School, Serchhip hian vohbik zirlai 36 a nei mek a ni.
