E. LUNGDAR-AH POSHAN PAKHWADA – ECCE FESTIVAL HMAN A NI
Vawiin khan E. Lungdar ICDS Project huaihawtin E. Lungdar Futsal Ground-ah Early Childhood Care and Education (ECCE) Festival hman a ni.
He hun hmanpuitu East Lungdar BDO Pi Marilyn Lalruatkimi chuan thu sawiin, kum 6 tlin hma hi naupangte thluak leh taksa ṭhan chak lai ber, an hmalam hun hriltu ‘lungphum pawimawh’ a nih thu a sawi a. ‘Heng hun chhunga enkawlna leh kaihhruaina dik (ECCE) an dawn chuan, thiamna leh hriselna mai bakah, mi dangte nena khawsak ho dan (social skills) thlengin an thiamin nasa takin an than len zelnaah pawh hma an sawn phah thei a ni’ a ti.
Pu Jeremy Lalhmingsanga, Circle Officer pawhin kum 6 hnuai lam tana zirna kalpui dan ṭha (ECCE method) leh an hmasawnna atana pawimawh hrang hrangte a sawi bawk a. Inelna chi hrang hrang – Naute Invah Chaksiak (Baby Crawling Competition), Teaching Learning Material (TLM) Making Competition leh naupang kal khawmte tana inelna chi hrang hrangte buatsaih niin naupang leh nu leh pa thahnem tak an kalkhawm a ni.
He festival hi Poshan Pakhwada (kar hnih chhung awh hriselna campaign) nena hman kawp niin naute, nute leh naupang enkawl dan leh eitur hrisel (balanced diet) pek pawimawhzia chungchangte leh thil pawimawh chi hrang hrangte inzirtirna hun atan hman thin a ni.
