Lunglei District-ah Agriculture Department-in DPI Drone Survey an kalpui mek
Digital Agriculture Mission (DAM) hnuaia Digital Public Infrastructure (DPI) kal tlangin Agriculture & Farmers’ Welfare Department chuan tun lai hian Lunglei District chhungah drone hmanga huan lo ram leh thlai chin chanchin zir chianna, Drone Survey an kalpui mek.
Lunglei District Agriculture Office chuan April ni 14, 2026 (Thawhlehni) aṭang khan drone survey hi kalpui ṭanin, vawiin khan Lunglei District-a Ṭawipui North-I khuaah drone survey hi chhunzawm a ni a. Ṭawipui North-I huam chhung Digital Crop Survey hnuaiah hian plot area 150.17 awmin, Drone Team hian Ṭawipui North-I-ah hian square kilometre 34.7-a zau buh leh thlai chinna ram (agricultural land) tuam thei tura ngaih a ni.
Lunglei District Agriculture Office hotute chuan sawrkar laipuiin Union Budget (2023–2024) a lo duan tawh angin Digital Technology hmanga department hrang hrang – Finance, Healthcare, Education leh Retail-ah te sawrkarin hma a lak zung zung theih nan programme hrang hrang duangin, hma lakna kalpui mek zel a nih thu an sawi a. Hemi bawhzui nan hian Agriculture hnuaiah data fel tak a awm theih nan, Digital Agriculture Mission hnuaiah Digital Public Infrastructure chu kalpui mek a nih thu leh Farmer Registry, Digital Crop Survey, Digital General Crop Estimation Survey (DGCES) leh IT-enabled System thuam chak te kalpui mek a nih thu an sawi a. Hemi hnuaiah hian lo neitu (farmer)-te leh an huan lo ram te, an thlai chin zawng zawngte chanchin kimchang thei ang ber lak khawm tum niin, hei hi Digital Public Infrastructure hnuaia Agriculture data kimchang tak chhawp chhuah theihna tur a nih thu an sawi.
District Agriculture hotute chuan Digital Public Infrastructure hnuaiah Mizorama lo neitute’n hamṭhatna an dawn ve theih nan Mizoram sawrkar chuan Ministry of Agriculture & Farmers’ Welfare, Government of India nen Memorandum of Understanding (MoU) an ziah thu leh Project hming atan “Developing Digital Agriculture Infrastructure in Mizoram” tih hmangin DAM Scheme chu kalpui mek a nih thu sawiin, he project hnuaiah hian Mizoram district hrang hrangah Agriculture and Allied hnuaia hna thawhte Drone-based Survey kalpui a nih thu an sawi a. Drone Survey hi phase hrang hranga kalpui tur a nih thu leh tun dinhmunah sawrkar laipuiin Phase-I chhungah square kilometre 1,000-a zau chu Drone Survey atan a pawmpui (approve) tawh thu an sawi bawk.
Drone-based Survey atan hian M/s Theta Enerlytics Pvt. Ltd, New Delhi te nen thawk ho turin ruahmanna siam niin, Drone Team hian ṭha taka hna an thawh theih nan Agriculture, Horticulture, Animal Husbandry & Veterinary, Fisheries, Sericulture, Land Resources and Soil & Water Conservation Department hnuaia thlai chinna ram (cultivated land) hrang hrangte KML files hmang turin phalna pek tawh an ni a. Drone Survey hi Serchhip, Kolasib leh Mamit District-ah te kalpui tawh niin, square kilometre 700-a zau cultivated land survey zawh fel tawh a ni.
