Lungleiah Green-Ag 11th Technical Support Group (TSG) ṭhut khawm buatsaih a ni
Vawiin khan Green-Ag Project Mizoram hnuaia Green Landscape Implementation Unit (GLIU) Lunglei Technical Support Group (TSG) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah a ṭum 11 nan an ṭhu khawm a. Agriculture line department aṭangin mi thiamte kal khawmin, Green-Ag Project hma lak tawhna leh kum 2026–2027 atana ruahmannate an thlir ho.
Bawrhsap Pi Navneet Mann chuan Green-Ag project chu lo neitute’n ram tichereu tam lo zawnga eizawnna ngelnghet an neih theih nana ṭangkai tak a nih thu sawiin, a hlawhtlin ngei a beisei thu leh Mizoram hmun dang tan pawha entawn tlaka hma lak chhunzawm zel a nih a beisei thu a sawi.
State Technical Coordinator Dr Kenny Vanlalhriatpuia’n project report tawi a pe a. Mizoram chu India rama Green-Ag project hma lakna kalpui ṭha berte zinga mi a ni tih tar langin, Green Landsacape Implementation Unit (GLIU) ṭobul leh a thil tum hrang hrangte a sawi fiah bawk.
Green-Ag GLIU Team Leader-in-charge Dr Vanlalchhandama chuan kum hmasaa hma lakna hrang hrang dinhmun a tar lang a. Kum 2026–2027 atana project hmachhawp (Annual Work Plan & Budget) leh hma lak hmanhmawh ṭul bikte chu committee hmaah pharhin, Chairman kaihhruaiin sawi ho zui a ni.
He hunah hian Lunglei District-a hmachhawp langsar zual – Sustainable Agriculture hnuaia vaimim, hmarcha, bekang leh thlasik thlai chin dan tur te; project hnuaia vawk leh ar vulhtute tana zirtirna pek dan tur te; thing phun leh kangmei chhuak tur venna kawnga hma lakna tur te leh protected area chhehvela ramngaw leh nungcha humhalh dan tur chungchang te sawi ho a ni.
He ṭhut khawmah hian Green Landscape Management Plan (GLMP) hma lakna hrang hrangte thlir ho niin, Lunglei District-a line department hrang hrang nena thawh ho dan tur (convergence) chungchang sawi ho a ni bawk a. Kum 2026–2027 Annual Work Plan leh Budget atana ruahman cheng nuai 133.37 (₹1,33,37,665/-) chu pawm a ni bawk.
Green-Ag Project hnuaiah hian Lunglei leh Mamit District-ah hectare 8,972.1 vela zauvah leh khaw 38-ah hma lak mek a ni a. Lunglei District-ah hian Bunghmun RD block-a khaw 13-ah he project hi kalpui a ni a. April ni 10 khan Mamit District Annual Work Plan & Budget cheng nuai 152.86 (₹1,52,86,305/-) chu pawm a lo ni tawh bawk.
Green-Ag Project hi Food and Agriculture Organisation (FAO) leh Global Environment Facility (GEF) fund hnuaia kalpui niin, a tum ber chu India rama lo neitute’n ngelnghet zawk leh ramngaw tichereu lo zawnga eizawnna tlo leh hmasawnna an neih theih nana hma lak a ni.
