Larsap, CM leh Party hruaituten State Day pualin mipuite chibai an buk
Mizoram State Day pualin Larsap, Chief Minister leh party hruaituten mipuite State Day chibai a buk.
Gen (Retd) Vijay Kumar Singh chuan Mizoram chu state a nih hnuah muanna, hmasawnna leh hlawhtlinna kawng hrangin a zawh chho a ti a, State Day chu Mizo mipuite chhelna, inpumkhatna leh suangtuahna ataka nemnghehna ani tih a sawi.
Larsap chuan Mizoram chu rampum huapa hriat a hlawh thinna hnam ziaranga hausa tak, nunphung nghet tak leh midangte inzahtawn taka awmna hmun ani a ti a, khawtlang inlungrualna hloh chuang lovin zirna, hriselna, hmasawnna ruhrel din leh ngelnghet siam kawngah pawh nasa takin hma a sawn tih sawiin tanrualna leh inremna nen kum 2047-a India ram intodelh leh mahni kutkea ding thei ‘Viksit Bharat’ siam turin mipuite thawhpuiah a sawm a ni.
Chief Minister Pu Lalduhoma chuan Mizoram mipuite State Day chibai bukin State Day dam taka an thlen theih nachhan chu Mizo mipuite tawngtaina avang ani tih a sawi.
Chief Minister hlui leh MNF President Pu Zoramthanga pawhin Mizo mipuite State Day chibai bukin Mizoram State lo pianchhuahna chu MNF leh India Sorkar Inremna Thuthlung rah a ni a ti a. Peace Accord hlawhtling ber zinga mi an neih theihna kawnga mi tin te tanrualna chu chhuanawm atih thu sawiin Mizoram State Day chu Mizoram chhunga chengte tan mai bakah hmun hrang hranga cheng Mizo mipui zawng zawngte tan a hlu takzet tih a sawi.
BJP Mizoram President Dr K. Beichhua chuan Mizoram Statehood Day pualin mizo mipuite chibai a buk bawk.
