Khawzawlah 2nd India Reserve Battalion Silver Jubilee lawm
Vawiin khan Khawzawlah 2nd India Reserve Battalion (2nd IR Bn.) kum 25-na (Silver Jubilee) chu an headquarters-ah lawm a ni a, Director-General of Police Pu Sharad Agarwal khuallian niin silver jubilee lungphun a hawng a ni. Khuallian Pu Sharad Agarwal chuan 2nd IR Bn. kum 25 an tling chu a lawmpui thu a sawi a, an inpekna leh an taimakna avangin Khawzawl, Champhai leh Saitual district mipui te chu him takin an nungin an khawsa thei tih sawiin a fak a. Zu leh ruihhlo dona kawngah hna an thawk tha em em bawk a, heta police thawk mek te leh lo thawk tawh te an tuarchhelin an thawkrim a, mipuiin an chungah lawmthu sawi an phu a ni tih a sawi. A hmaa hna an lo thawh that angin Commandant leh a hnuaia awm zawng zawng te taima tak leh inpe takin hna thawk chhunzawm zel turin a fuih a, kum dang tam tak an din zel theih nan duhsakna a hlan bawk a ni.
He hunah hian 2nd IR Bn. Commandant Pu KL. Vulmawia chuan khuallian leh mi sawm bikte lawmna thu a sawi a, 2nd RO Pu C. Lalremruata’n 2nd IR Bn. chungchang, din a nih atanga an hnathawh dan te a sawi. Deputy Inspector General of Police (DIG) Eastern Range Pu Rohit Meena chuan thu a sawi bawk a, mahni chhungkua leh hriselna enkawl tha turin thawktute a chah. A hmuna lo thawk tawh police leh mi chi hrang hrangin thu sawina hun an hmang a, Dy. Commandant Pu R. Lalrinmawia chuan lawmthu sawiin hun a khar a ni. Khuallian Pu Sharad Agarwal ho hian ruai kil nghal a ni a, a inkarah intihhlimna hun – zai leh lam te’n hun hman a ni bawk.
He hunah hian DIG Armed Pu Saidingliana leh Khawzawla department hrang hrang hotute an tel a ni.
