UD&PA MINISTER-IN CHAWNPUI SPORTS CENTRE SAK THAR A HAWNG
Vawiin khan UD&PA Minister Pu K. Sapdanga’n Urban Development & Poverty Alleviation Department hmalaknaa sak thar, Chawnpui Sports Centre, Chawnpui veng ami a hawng. Hawnna inkhawm hi UD&PA Secretary Pu Lalmalsawma Pachuau-in kaihruaiin department mi leh sa te bakah Chawnpui Local Council hruaitu te, YMA, MHIP leh MUP member-te he hunah hian an tel a ni.
Minister Pu K. Sapdanga chuan thu sawiin Sports Centre sak thar a nih theih nana tha leh zung thawhtu hrang hrang, bialtu MLA Pu TBC Lalvenchhunga te, khawtlang hruaitu te, contractor te, sports Minister leh sawrkar hmasa ten hma an lo lak tawhnate fakin, thawh hona tha tak a awm avanga puitlin theih a nih thu a sawi a. Sports pawimawhzia sawiin tunlai khawvelah sawrkar hnaa luh a harsat tawh thu leh chutih rualin sports lamah thalaite tan eizawnna kawng zau zawk a inhawn mek thu a sawi a; Mizoramah pawh Sports Infrastracture tha tak tak kan nei tawh thu leh sawrkar pawhin theih tawp chhuaha hma a lak mek thu te, thalaite chu naupang te te an nih lai atanga mumal taka train an nih chhohna turin Empowering Mizoram Sports pawh kalpui tan a nih thute sawiin, nu leh pa te pawh an fate, sports lam tui mite chu thahnemngaihpui nachang hre deuh deuh turin a chah bawk. Chawnpui Sports Centre ngei pawh hian tuna atang reiloteah Mizoram tihmingthatu thalai eng emaw zat a thar chhuah a beisei thu sawiin, khawtlang inpumkhatna thlentu, ruihhlo laka thalaite humhimtu, hmun pawimawh tak lo ni zel turin duhsakna a hlan a; tunah hian building hmasa zawk pawh sak that mek a nih thu leh Gym leh infiamna chi hrang hrangte pawh tih theihna tura thawm that leh tih changtlun zel tur a nih thu a sawi bawk a ni.
Vawiina Sports Centre hawnna inkhawmah hian Er. C. Malsawma, Executive Engineer, UD&PA hnen atangin Technical Report ngaihthlak a ni a, report-a tarlan a nih danin project cost hi 3.83 Cr a ni a, SASCI atangin 3 Cr hmuh niin State sawrkar sum atangin nuai 83.37 hmuh a ni a; Contractor atan M/S Zothan Consultancy Services, Luangmual, Aizawl rawih niin, May 2023 khan sak tan a ni a, October 2025-ah sak zawh a ni ta a ni. Sports Centre hi chhawng 6 a sang a ni a, RCC famed structure niin Seismic Zone 5 specification leh codes te hmanga design a ni a; Ground floor leh Basement – I te chu lirthei dahna atana ruahman niin, a vaiin LMV 40 leh two-wheeler 35 vel dah theihna tur a ni a; 1st floor leh 2nd floor-te chu 400 sqm a zau niin Badminton Court atan hman a ni a, Badminton hall-ah hian 4.5mm a chhah, Carpet tha chi KTR Product, Badminton World Federation Certified phah a ni bawk. Basement – II leh III te hi 275 sqm leh 125 sqm a zau an ni bawk a ni.Vawiin hun hmannaah hian Pu Ramchuana, Project Committee Chairman, Chawnpui Br. YMA pawhin thu sawiin UD&PA Director Pu Jacob Lalawmpuia’n lawmthu sawiin hun hi a khar a ni.
