Siaha-ah Road Safety Month hawnna neih a ni
Tukin khan Siaha District Transport Office, bultumin Bazar Traffic Point-ah Road Safety Month hawnna neih a ni a, DTO Pu Manesia Khaimeichho chuan he hun hi kaihruaiin Pu VL Hruaizela Khiangte chuan Road Safety Month hawnna a nei a ni. District Bawrhsap Pu VL Hruaizela Khiangte chuan Road safety Month chuan mahni lirthei emaw khualzin phur lirthei emaw sawrkar lirthei khalhtute zawng zawng a huam vek a, motor neitute pawh a huam vek a ni, a ti. Dan thar hranpa a awm lo a, Dan a la ngai reng a, Dan pangngai awm sa khirh taka kenkawh chu he road safety month thil tum a ni, a ti. Khawpui fai inelnaah Siaha chu Mizoram pumah a fai ber dawttu a thlan a ni a, chu mai bakah District Beautification inelnaah pawh pahnihna lai a nih phak thu tarlangin khawpui fai leh thianghlim taka enkawl leh cheimawi kawngah nasa takin hmasawnna a awm a, hawihhawmlo taka lirthei khalh chu a inhmeh lo hle a ti bawk a, mipui mimir leh vantlang himtlan nan Road Safety Month chu duhsakna hlanin a hawng nghal a ni.
Addl SP Pu Beimosia Lapi chuan kalkhawmte chu chibai a buk a, Siaha ah rui chunga lirthei khalh hmuh tur an la awm fo chu pawi a ti hle a, rủi chunga lirthei khalh thinte avanga nunna chân pawh an la awm thin a ti a. Rui chunga lirthei khalh hremna chu vawi khat manah cheng 10000 chawi leh jail tan theih tih hre thar leh turin leh rilru fim tak nen lirthei khalh theuh turin a chah. Kumtlinglo lirthei khalh an thahnem hle chu a ngaihmawhawm hle a ti a, India ram danah Kum 18 chin chunglam chauhin driving license an nei thei a, kum 18 tlin hmaa khalhte chu an Chhungte emaw lirthei neitute hrem theih niin cheng 25000 thleng chawitir theih an ni a, kumtlinglo chu lirthei khalhtir lo turin kalkhawmte a chah bawk. Addl SP chuan Siaha Mipuite chu Driving manner inzirthar a ngai a ti a, Road Safety Month chhung hian No tolerance hman a nih dawn avangin khauh taka dan kenkawh a ni dawn a, mipui pawhin tha taka tawiawma, dân leh đun awmte zawm theuh turin a sawm a ni.
Mara Thyutlia Py( MTP) Gen Hqrts aiawhin Asst GS Pu N Solomon Beihlotha chuan Siaha chu District upa pawl tak a ni a. A kum a tam ang aiin hmasawnna hmel erawh hmuh tur a tam lo hle a ti. Ke pahnih nei lirthei intlansiak (race) thin an awm thin chu pawi a ti hle a, ching tawh lo turin mipui a ngen a ni. Lirthei a tam chho a, Driverte fimkhur tlan a ngai a , lirthei chhung atanga ring tak taka hla zaitir thin te pawh sim tura chahin he road safety month hi Mipui in an zawm theuh nan leh rah tha a chhuah ngei theih nan duhsakna a hlan nghal a ni.
