Union Textiles Minister Pu Giriraj Singh chuan Mizoram a tlawh
Union Textiles Minister Pu Giriraj Singh chuan vawiin khan Aizawl lo thlengin Lengpui Airport ah Mizoram Chief Minister Pu Lalduhoma leh Sericulture Minister Pu Lalthansanga ten an hmuak.
Ni hnih cham tura lo zin Union Textiles Minister hi Lengpui Airport Lounge ah Mizoram Chief Minister Pu Lalduhoma chuan kawmin, textiles lama Mizoram hmasawnna tur thil pawimawh te a sawipui a. Hemi hnu hian Lok Bhavan pan nghalin Lok Bhavan Mini Conference Hall-ah Sericulture Minister Pu Lalthansanga telpuina hnuaiah Sericulture Department, Cooperation Department, Agriculture & Farmers Welfare Department, Eastern Zone Weavers’ Service Centre leh Development Commissioner for Handlooms office a thuneitute nen meeting an nei a ni.
He meeting-ah hian Cooperation Commissioner & Secretary Pu Udit Prakash Rai leh Sericulture Secretary Pi Florence Zotluangpuii chuan “Mizoram’s Sericulture Potential at a Glance” tih thupui hmangin thu an sawi a. Tuna Mizoram Textile dinhmun leh kum 2047 thlenga an hmachhawp te power point hmangin an sawifiah a ni. Agriculture Joint Director Pi R.Lalramhluni pawhin an department hnuaia hmalakna hrang hrang leh hmachhawp te a hrilhfiah a. Development Commissioner for Handlooms Office leh Eastern Zone, Weavers’ Service Centre, Ministry of Textiles official te pawhin PPT hmangin an hmalakna hrang hrang leh an hmachhawp te an tarlang bawk.
Union Minister hian vawiin vek khan Tlangnuama Zozia Silk & Handloom leh Kulikawn Venga Lapar te a hmunah a tlawh nghal a. Zozia hi silk hmanga puantahtu lar niin Union Textiles Ministry hnuaia Development Commissioner for Handloom chuan National Merit Certificate te pawh an lo hlan tawh a ni. Union Minister hian Zozia-ina cocoon an thar chhuah dan leh silk an siam dan te a zawt a. Hlawk zawka cocoon an tharchhuah dan tur te a sawipui.
Lapar, Kulikawn te pawh hian silk hmangin Mizo puan an tah a, kawr design hrang hrang siam chhuakin, Mizoram mai ni lo, foreign thleng pawha dawrtu an hmuh thu an sawi a. Heng hmun te hi Union Textiles Minister Pu Giriraj Singh chuan tlawhin, Central leh State Sawrkar hotuten an tawiawm a. An hmalakna te hmuhpuiin, thawktute nen inkawmna hun an hmang a ni.
Pu Siva Kumar, Member Secretary, CSB, CMERTI, Pi Vrunda Manohar Desai, Textile Commisioner, Ministry of Textiles; Dr. Karthik Neog, Director, CSB-CMERTI leh Pu S.Bandyopadhyan, Director, Eastern Zone Weavers’ Service Centre, Ministry of Textiles ten Union Minister hi an tawiawm a ni.
