Tourism Minister Lalnghinglova Hmar in Ni 7 awh tur Winter Festival Lammualah hawng
Nizan khan Tourism Minister Pu Lalnghinglova Hmar chuan ni 7 awh tur Winter festival chu Lammualah a hawng. Minister hian Stall hrang hrang a tlawh kual hnuin Festival hawnna hun a hmang a. He hunah hian Festival neih a nih chhan te leh a tum te a sawifiah. Tourism Minister chuan Festival chu Mizo mipuite leh thalai te hlimtak leh thianghlim taka an in hmuhkhawmna tur te, khualzin kan hip theih na tur te, keimahni leh keimahni kan in tihphur tawn a, kan ei leh in siam te kan kutchhuak leh kan thil neih zawrh turte kan hralh theihna hun remchang a ni a ti a. Heng bakah hian kan ram mawina, kan tlang, kan lui, kan ruam leh kan boruak thianghlimte, state dang mi te leh khawvel hmun danga miten an hmuh a an chhim ve theihna tur te a buahsaih a nih thu a sawi.
Festival chu December Ni 15 atanga 20 thleng hman phawt a ni a nga, Ni 23-ah Christmas Parade neiin ropui taka khar a ni dawn tih a sawi. Parade hi Chanmari kawn atanga tan tur a ni anga, hemi hunah hian zaithiam te, milar hrang hrang te leh mipui te kalkhawmin Christmas costume kan neih ang ang te inbelin Lammualah Christmas Carol a chhunzawm a nih tur thu a sawi bawk. Minister chuan, Christmas Parade chu kumin ah keimahni in kan kal phawt ang a, nakumah hnamdangin min rawn zawm ve a nga, tun atanga kum 5-10 ah chuan, India ram state dang mai nilo, khawvel hmun dang atanga an pan khawm theih tura buatsaih kan duh a, chutiang tur chuan hma kan la tan dawn a ni a ti.
December ni 31 a hman tur, Sakawrhmuituai tlang atanga kum khata nitla hnuhungber thlir hona neih turah pawh mipui te, a tam thei ang berin lo chhim turin a sawm nghal bawk. He hunah hian zaithiam hrang hrang zai ngaihthlak tur a awm dawn a ni. Minister hian Kum 2026 atana Mizoram Tourism in Calendar an siam chu a tlangzarh nghal a bawk.
