Social Welfare Department leh Mizoram Presbyterian Kohhran te tangkawpin Narcotics Awareness Campaign bul an tan
Vawiin khan Social Welfare Department leh Mizoram Presbyterian Kohhran te tangkawpin Narcotics Awareness Campaign chu Chanmari Kohhran Hallah neih a ni a. Pi Lalrinpuii, Social Welfare Minister in a hman pui.
Social Welfare Minister chuan Mizoram Sorkarin Hulhliap a buatsaih a hlawhtlin viau laiin kawng chi dang danga ruihhlo avanga harsatna tuarte puih dan tur Sorkarin a ngaihtuah zel thu sawiin Minister chuan hautak lutuk silo system tangkai si neih a tul a chumi atan chuan Narcotics Anonymous kalpui a tul thu a sawi a. After Care Skill Training lamah pawh Mizoram in Synod te leh BCM, ECM, LIKBK te leh NGO te thawhpui dan tur a duang mek tih a sawi bawk.
NA Awareness hi Aizawl leh a chhehvel a kohhran 27 ah neih chhoh tura ruahman a ni a. SWD hnyaia MSD&RB leh Mizoram Drugs User Forum(MDUF) lam atangin Resource Person leh Counsellor ten hun an hmang thin dawn a ni.
Ruihhlo ngai chauh ni lovin an chhungte pawh sawm tel an ni a, Family Sensitisation hun buatsaih tel nghal thin a ni dawn a ni. Minister chuan an program hman chhoh zel turah a mamawhtu ten tangkai taka an hman theih nan Kohhran, tlawmngai pawl leh chhungkua ten ruihhlo avanga harsatna tuarte rawn kalpui turin a ngen nghal bawk.
Upa Peter Zohmingthangan inkhawm hi kaihruai in Rev Dr. H. Vanlalruata, Bialtu Pastor in hunserh hmangin Pu Muses Zofaka Pachuau, Adviser, MDUF leh Pi Lalfakawmi, Executive Officer, MSD&RB ten awareness campaign hun hi an hmang a ni.
