Serchhip district-ah national deworming day hman a ni
Vawiin khan Reproductive & Child Health, National Health Mission (NHM) bultumin National Deworming Day Serchhip District-ah hman a ni a, a hawnna inkhawm hi Marian High School Serchhip-ah buatsaih niin Deputy Chief Medical Officer Dr. Lallawmkimi Chhakchhuakin a kaihruai a, SDO (Sadar) Pi Rebecca Laldinmawii Hrahsel chuan khuallian niin hun a hmanpui.
Vawiin hun hmannaah hian SDO (S) Pi Rebecca Laldimawii Hrahsel chuan sawrkarin naupangte hriselna a ngaihpawimawh thu sawiin, Dy. CMO Dr. Lallawmkimi Chhakchhuak hnen atangin kut silfai that loh avanga rulhut kai theih dan leh kut sil dan (six steps of handwashing) ngaihthlak a ni a. Dr. Fabian Malsawmkima, MO (ARTC) chuan rulhut hlo ei pawimawhzia sawiin, HIV (AIDS) chungchang leh ruihhlo that lohna te a sawi bawk. Marian High School Principal, Father John Zoduhsanga chuan sawrkarin hetiang programme pawimawh tak mai a duang chu lawmawm a tih thu a sawi a; Deborah Vanlalchhuangin lawmthu sawiin hun a khar a; hemi hnu hian naupangte hnenah rulhut hlo pein eitir nghal an ni.
Rulhut hlo (Albendazole) hi district chhunga sikul hrang hrang, college leh Anganwadi centre-ahte a huhova sem tur a ni a. Vawiina la ve hman lote leh naupang sikul lut/kal lote chu August ni 17, 2026 (Mop-Up Day) ah ASHA ten an inah kalchilhin an sem chhunzawm leh dawn a ni. Rulhut hlo hi kum 1 leh kum 2 inkar naupangte hnenah 200mg (a chanve) pek tur niin, kum 2 chin chunglamte hnenah 400mg (a pum) pek tur a ni.
Rulhut hlo sem runpui hi kum khatah vawi hnih – February leh August thlaahte neih thin niin kumin February thla khan a thawh khatnaah hlawhtling takin Serchhip District-ah sem a lo ni tawh a.
August 2026 atan hian Serchhip district chhungah Rulhut hlo dawng tur (target beneficiary kum 1 atanga 19 inkar) mi 23,160 an awm a; heng zingah hian Anganwadi naupang 4,892; Sawrkar sikul (Govt. Aided Sikul tiamin) naupang 7,898; Private Sikul naupang 9,893 leh school kal lo naupang 457 bakah Anganwadi kal lo naupang 20 an awm a ni.
