Serchhip DC hovin Reserved Forest chungchang sawiho
Vawiin khan Serchhip DC Meeting Roomah Reserved Forest chungchang sawiin District Level Committee chu DC Pu Paul L Khuma hoin an thukhawm.
Supreme Court thupek angin Land Revenue & Settlement Department chuan contour-based mapping of District area -wise Reserved Forest chu MIRSAC Director hma la turin a hriattir tawh a. District tin Assistant Commissioner (Revenue) te chu an District huam chhung theuha Reserved Forest huam chhunga mimal ram nei te list lo peihfel tura tih an ni bawk a. Ram relocate ngai te, landholding cancel tul te leh harsatna awm apiangte sawiho turin March 2026 chawlhkar thumna ah SIT, GAD Meeting neih a ni ang. Council of Minister pawmpuina chu April 2026 chhunga lak tur niin, Supreme Court thupeka hmalakna Affidavit/report file chu May 2026 chhungin tihfel tur a ni bawk.
Supreme court order angin forest reserve area-a ram nei te chu an enkawl dan a zira category siamfel a ngai a, a hmuna endik field verification kalpui vek tur niin April ni 15 2026 hmaa inpeih fel tura beisei an ni. Forest Department chuan verification an lo buaipui anga, VC te pawhin an huam chhunga mi te ngun taka lo enfel turin chah an ni bawk.
He meeting ah hian Additional DC Pu Lalrinzuala, SDO (Sadar) Pi Rebecca Laldinmawii Hrahsel, Assistant Commissioner (Revenue) Pu Gaston Vanlalhriatpuia, SDC Pi C.Vanlalchhanhimi, DFO Thenzawl Dr R.Lalnunrenga, DFO N.Vanlaiphai Pu Thanliana Hauhnar te bakah Thenzawl West, Neihloh, Hualtu leh Hmuntha VC aiawh te an tel a ni.
