Scientist-ten Kolasib leh Mamit District-a Kuhva tam hri zirchiang
Nimin hian Land Resources, Soil & Water Conservation Department bul tumin ICAR-Central Plantation Crops Research Institute (CPCRI), Kasaragod, Kerala leh Department of Arecanut & Spices Development (DASD), Ministry of Agriculture & Farmers Welfare, Govt. of India aṭanga mithiam (Scientist) lokal ten Mamit District leh Kolasib District chhunga kuhva chingtuten kuhva tam avanga harsatna an tawh mek te a hmun a kal chilhin zirchianna an nei.
Mithiamte hi khaw hrang hranga kuhva chingtu pawl te leh village council hruaituten lo dawngsawngin an harsatna te an lo thlen a. Scientist-te chuan kuhva chingtute hnenah kuhva phun atanga a enkawl chhoh dante leh kuhva kungte natna laka venhim theih dante a hmunah an sawifiah a. Kuhva tam hriin a ei chhiat mekte leh a ei chhetu rannungte chu a sample lain hmunpuia zirchian turin an hawn nghal a ni.
Scientist-te hian uluk zawkin an hmunpuiah zirchianna an nei zui dawna, chumi hnuah report-te buatsaihin Union Minister of Agriculture & Farmers Welfare hnenah an thehlut dawn a ni. Mizoram kuhva chingtute tana kuhva chin dan leh enkawl dan dik zawk (Package of Practice) an buatsaih dawn bawk a, he PoP hi Land Resources, Soil & Water Conservation Department chuan kuhva chingtute tan mizo tawng ngeia chhiar theih turin a lo buatsaih ve leh dawn a ni.
Scientist-te hi LRS&WC Director Er.Vanlalmuanpuia Chhangte in a hova, Mamit leh Kolasib a LRS&WC Department District Officer-te, CPCRI Principal Scientist Dr.Ravi Bhat, Scientist Dr.R.Thava Prakasa Pandian, DASD Deputy Director Shri. Babulal Meena te an tel bawk a ni.
